హైదరాబాద్‌ ఎయిర్‌పోర్ట్‌కు అవార్డు

జీఎమ్మార్‌ హైదరాబాద్‌ ఇంటర్నేషనల్‌ ఎయిర్‌పోర్ట్‌ మరో అవార్డును చేజిక్కించుకున్నది. బ్రిటన్‌కు చెందిన ప్రముఖ ట్రావెల్‌ ఎక్స్‌పీరియన్స్‌ ప్రొవైడర్‌ అట్రాక్షన్‌ టికెట్స్‌.కామ్‌ తాజాగా విడుదల చేసిన ప్రపంచంలోని కుటుంబాలకు అత్యంత అనుకూలమైన విమానాశ్రయాల జాబితాలో హైదరాబాద్‌ ఎయిర్‌పోర్ట్‌ నాలుగో స్థానం దక్కించుకున్నది.

• ప్రపంచంలోనే నాలుగో ఫ్యామిలీ-ఫ్రెండ్లీ విమానాశ్రయంగా గుర్తింపు

హైదరాబాద్‌, జూలై 13 : జీఎమ్మార్‌ హైదరాబాద్‌ ఇంటర్నేషనల్‌ ఎయిర్‌పోర్ట్‌ మరో అవార్డును చేజిక్కించుకున్నది. బ్రిటన్‌కు చెందిన ప్రముఖ ట్రావెల్‌ ఎక్స్‌పీరియన్స్‌ ప్రొవైడర్‌ అట్రాక్షన్‌ టికెట్స్‌.కామ్‌ తాజాగా విడుదల చేసిన ప్రపంచంలోని కుటుంబాలకు అత్యంత అనుకూలమైన విమానాశ్రయాల జాబితాలో హైదరాబాద్‌ ఎయిర్‌పోర్ట్‌ నాలుగో స్థానం దక్కించుకున్నది. అట్రాక్షన్‌ టికెట్స్‌.కామ్‌ నిర్వహించిన అధ్యయనంలో ప్రపంచవ్యాప్తంగా 140కి పైగా విమానాశ్రయాలను కుటుంబాలకు అనుకూలమైన తొమ్మిది ప్రధాన ప్రమాణాల ఆధారంగా విశ్లేషించింది.

దీంట్లో హైదరాబాద్‌ ఎయిర్‌పోర్ట్‌కు 20 మార్కులకు గాను 18.5 మార్కులను సాధించింది. గూగుల్‌ సమీక్షల రేటింగ్‌లు, పిల్లల ఆట స్థలాలు, కుటుంబాల కోసం ప్రత్యేక భద్రతా తనిఖీ లైన్లు, శిశు సంరక్షణ సదుపాయాలు, బేబీ స్ట్రోలర్‌ సేవలు, విశ్రాంతి, వై-ఫై నాణ్యత, విమానాశ్రయ విస్తీర్ణం, ప్రయాణికులకు అందించే సౌకర్యాలను పరిగణనలోకి తీసుకున్నారు. ఈ సందర్భంగా జీఎమ్మార్‌ ఎయిర్‌పోర్ట్‌ సీఈవో కదిర్‌ కదిరవన్‌ మాట్లాడుతూ.. ప్రపంచంలో కుటుంబాలకు అత్యంత అనుకూలమైన విమానాశ్రయాల్లో ఒకటిగా గుర్తింపు పొందడం గర్వకారణంగా ఉందన్నారు.