Elan Musk : ట్విట్టర్లో వచ్చే శుక్రవారం నుంచి మూడు రంగుల వెరిఫికేషన్ టిక్లను తీసుకొస్తున్నామని ఎలన్ మస్క్ వెల్లడించిన సంగతి తెలిసిందే. అంతేకాదు ఈమధ్యే పోలింగ్ ద్వారా అమెరికా మాజీ అధ్యక్షుడు డొనాల్డ్ ట్రంప్ ట్విట్టర్ ఖాతాను మస్క్ పునరుద్ధరించాడు. ఈ నేపథ్యంలో ట్వీట్ సంఖ్యను పెంచాలని ఒక యూజర్ మస్క్కు సలహా ఇచ్చాడు. ట్వీట్స్ సంఖ్యను 420 వరకు పెంచాలని అతను కోరాడు. అందుకు మస్క్ ‘నిజంగా మంచి ఆలోచన’ అంటూ సమాధానం ఇచ్చాడు. దాంతో, ట్వీట్స్ సంఖ్యను పెంచడంపై మస్క్ త్వరలోనే నిర్ణయం తీసుకుంటాడా? అనే వార్తలు వినిపిస్తున్నాయి. ఒకవేళ అదే జరిగితే.. ఇక యూజర్లకు పండగే.
ప్రస్తుతం ట్విట్టర్లో 280 అక్షరాల లోపున్న ట్వీట్స్ మాత్రమే పోస్ట్ చేయడానికి వీలుంది. మొదట్లో 140 క్యారెక్టర్స్ మాత్రమే ఉండేవి. అయితే యూజర్ల కోరిక మేరకు ట్విట్టర్ 2017 సెప్టెంబర్లో ఆ సంఖ్యను రెండింతలు చేసింది. మస్క్ ట్విట్టర్ను కొనుగోలు చేసిన తర్వాత భారీ మార్పులు చోటుచేసుకున్నాయి. ఉద్యోగుల తొలగింపుతో పాటు బ్లూ టిక్ వెరిఫికేషన్ వంటి నిర్ణయాలతో మస్క్ తీవ్ర విమర్శలు ఎదుర్కొన్నాడు.