న్యూఢిల్లీ, జనవరి 7: విదేశీ మారకం నిల్వలు హారతి కర్పూరంలా కరిగిపోతున్నాయి. 2021లో రికార్డు స్థాయికి చేరుకున్న నిల్వలు ఈ మరుసటి ఏడాది చివరినాటికి లక్షల కోట్ల స్థాయిలో కనుమరుగయ్యాయి. 2021 అక్టోబర్లో రికార్డు స్థాయి 645 బిలియన్ డాలర్లకు చేరుకున్న నిల్వలు..అదే ఏడాది చివరినాటికి 632.1 బిలియన్ డాలర్లకు పడిపోయాయి. ఇదే క్రమంలో 2022 డిసెంబర్ చివరినాటికి 562.85 బిలియన్ డాలర్లకు పతనమయ్యాయి. అంటే గత ఏడాదికాలంలో 70.1 బిలియన్ డాలర్లు తగ్గాయి.
మన కరెన్సీలో ఇది రూ.5.6 లక్షల కోట్లు. రిజర్వు బ్యాంక్ తాజాగా విడుదల చేసిన నివేదికలో ఈ విషయాన్ని వెల్లడించింది. డిసెంబర్ 30తో ముగిసిన వారాంతానికిగాను ఫారెక్స్ రిజర్వులు 44 మిలియన్ డాలర్లు పెరిగి 562.85 బిలియన్ డాలర్లకు చేరుకున్నాయి. రూపాయి పతనాన్ని కట్టడి చేయడంలో రిజర్వు బ్యాంక్ పూర్తిగా విఫలమయ్యింది. దీంతో విదేశీ మారకం నిల్వలు కరిగిపోవడానికి కూడా ఇది ప్రధాన కారణం. రుపీని కట్టడి చేయడానికి గతేడాది సెప్టెంబర్లో ఆర్బీఐ 33.42 బిలియన్ డాలర్ల విలువైన ఫారెక్స్ రిజర్వులను సైతం విక్రయించింది. అయినప్పటికీ గానీ రూపాయి పతనం ఆగలేదు. పాతాళంలోకి పడిపోయింది.