SVB-First Citizens | ఇటీవల సంక్షోభంలో చిక్కుకున్న సిలికాన్ వ్యాలీ బ్యాంక్ (ఎస్వీబీ)ని ఫస్ట్ సిటిజన్స్ బ్యాంక్ టేకోవర్ చేసింది. ఆర్థికంగా దెబ్బ తిన్న ఎస్వీబీ ఖాతాదారుల డిపాజిట్లు, రుణాలు కూడా ఫస్ట్ సిటిజన్ బ్యాంక్ పరిధిలోకి వెళ్లిపోతాయి. దీని ప్రకారం ఎస్వీబీ డిపాజిటర్లంతా ఆటోమేటిక్గా ఫస్ట్ సిటిజన్ బ్యాంక్ డిపాజిటర్లుగా మారతారు. ఎస్వీబీ ఖాతాదారుల డిపాజిట్లకు చట్ట పరిమితిని బట్టి యూఎస్ ఫెడరల్ డిపాజిట్ ఇన్సూరెన్స్ కార్పొరేషన్ (యూఎస్ ఎఫ్డీఐసీ) బీమా వర్తిస్తుంది. ఇప్పటికైతే ఎస్వీబీ బ్యాంకు కార్యకలాపాలను ఎఫ్డీఐసీ పర్యవేక్షిస్తుంది. సోమవారం నుంచి ఎస్వీబీ శాఖలు ఫస్ట్ సిటిజన్ బ్యాంక్గా ఖాతాదారులకు సేవలందిస్తాయి.
ఈ నెల 10 నాటికి ఎస్వీబీలో సుమారు 167 బిలియన్ డాలర్ల ఆస్తులు, దాదాపు 119 బిలియన్ డాలర్ల డిపాజిట్లు ఉన్నాయని ఎఫ్డీఐసీ తెలిపింది. ఎస్వీబీ-ఫస్ట్ సిటిజన్ బ్యాంక్ మధ్య కుదిరిన కొనుగోలు ఒప్పందం ప్రకారం 72 బిలియన డాలర్లకు ఎస్వీబీని ఫస్ట్ సిటిజన్ బ్యాంక్ టేకోవర్ చేస్తుంది. 16.5 బిలియన్ డాలర్ల డిస్కౌంట్ ధరపై ఎస్వీబీని ఫస్ట్ సిటిజన్ బ్యాంక్ సొంతం చేసుకున్నది. మరో 90 బిలియన్ డాలర్ల సెక్యూరిటీలు, ఇతర ఆస్తులు ఎఫ్డీఐసీ నియంత్రణలో కొనసాగుతాయి.ఎఫ్డీఐసీ నిర్వహించిన వేలం ప్రక్రియలో 110 బిలియన్ డాలర్ల ఎస్వీబీ ఆస్తులు, 56 బిలియన్ డాలర్ల డిపాజిట్లు, 72 బిలియన్ డాలర్ల రుణాలను ఫస్ట్ సిటిజన్ బ్యాంక్ టేకోవర్ చేస్తుంది. సిలికాన్ వాలీ బ్యాంక్కు చెందిన 17 శాఖలు సోమవారం నుంచి ఫస్ట్ సిటిజన్ బ్యాంక్ డివిజన్ కింద సేవలు ప్రారంభిస్తాయి.
ఎస్వీబీని టేకోవర్ చేసిన ఫస్ట్ సిటిజన్ బ్యాంకుకు 109 బిలియన్ డాలర్ల ఆస్తులు, 89.4 బిలియన్ డాలర్ల డిపాజిట్లు ఉన్నాయి. తాజాగా ఎస్వీబీని కొనుగోలు చేసిన ఫస్ట్ సిటిజన్ బ్యాంకుకు ద్రవ్య లభ్యత సమస్య తలెత్తకుండా ఫస్ట్ సిటిజన్ బ్యాంక్కు ‘లైన్ ఆఫ్ క్రెడిట్’ వసతిని ఎఫ్డీఐసీ కల్పించనున్నది.