Elon musk and Rents | రెంట్‌ కట్టని ఎలాన్‌ మస్క్‌.. దావా వేసిన ఇంటి ఓనర్‌

Elon musk and Rents | ప్రపంచంలోనే అత్యంత సంపన్నుడైన ఎలాన్‌ మస్క్‌.. తన ట్విట్టర్‌ కార్యాలయాల రెంట్లు కట్టడం లేదు. దీంతో కొత్త చిక్కుల్లో పడ్డాడు. శాన్‌ఫ్రాన్సిస్కోలోని ట్విట్టర్‌ ప్రధాన కార్యాలయం ఉన్న భవనానికి రెంట్‌ చెల్లించాలంటూ ఇంటి యజమాని నోటీసులిచ్చారు.

Elon musk and Rents | ఇప్పటికే పెద్ద సంఖ్యలో ఉద్యోగులను ఇంటికి పంపి విమర్శలు ఎదుర్కొన్న ట్విట్టర్‌ యజమాని ఎలాన్‌ మస్క్‌.. తాజాగా మరో కొత్త వివాదంలో చిక్కుకున్నారు. ట్విట్టర్‌ కార్యాలయం ఉన్న భవనానికి రెంట్‌ చెల్లించకపోవడంతో ఆ ఇంటి యజమాని మస్క్‌పై దావా వేశారు. 15 రోజుల క్రితం రెంట్‌ చెల్లించాలని కోరినప్పటికీ.. మస్క్‌ లైట్‌ తీసుకోవడంతో ఈ దావా వేయాల్సి వచ్చిందని భవనం యజమాని చెప్పారు. ఇదొక్కటే కాకుండా ప్రపంచవ్యాప్తంగా పలు కార్యాలయాలకు కూడా ఇలానే రెంట్‌ బాకీ పడ్డట్లు తెలుస్తున్నది.

అమెరికా శాన్‌ఫ్రాన్సిస్కోలోని హార్ట్‌ ఫోర్డ్‌ బిల్డింగ్‌ 30 వ అంతస్తులో ట్విట్టర్‌ ప్రధాన కార్యాలయం ఉన్నది. ఈ భవనానికి అద్దె చెల్లించాలని గత నెల 15 న ఎలాన్‌ మస్క్‌ ప్రతినిధిని కలిసి ఇంటి యజమాని కోరాడు. 30 వ తేదీలోగా చెల్లించనిపక్షంలో లీజుపై డిఫాల్ట్‌ అవుతుందని కూడా స్పష్టం చేశాడు. ఈ విషయాన్ని టైట్‌గా తీసుకున్న మస్క్‌.. రెంట్‌ చెల్లింపు జరపలేదు. దాంతో సదరు యజమాని కోర్టులో దావా వేశారు. ఈ విషయాన్ని బ్లూమ్‌బెర్గ్‌ నివేదించింది. ఈ భవనం అద్దె బకాయిగా రూ.1.1 కోట్లు చెల్లించాల్సి ఉన్నదని భవన యాజమాన్య సంస్థ కొలంబియా రెయిత్‌ ఆరోపించింది. ఈ మేరకు గత నెల 16 న నోటీసు ఇచ్చినట్లు కూడా సంస్థ పేర్కొన్నది.

ప్రపంచంలోనే అత్యంత సంపన్నుడైన ఎలాన్ మస్క్‌ కేవలం శాన్‌ఫ్రాన్సిస్కోలోని ప్రధాన కార్యాలయం భవనానికే కాకుండా ప్రపంచవ్యాప్తంగా ఉన్న ఇతర కార్యాలయాలకు కూడా అద్దె చెల్లించలేదు. ఎలాన్‌ మస్క్ ట్విట్టర్‌ను స్వాధీనం చేసుకున్నప్పటి నుంచి ఆస్తి యజమానులు అద్దె పొందడం లేదు. భవనాలను ఖాళీ చేయాలని ట్విటర్‌ను భవన యజమానులు కోరుతున్నా.. కంపెనీ నుంచి ఎటువంటి స్పందన కనిపించడం లేదు. కొన్ని ప్రాంతాల్లో భవనాలను ఖాళీ చేయాలని సంస్థ ప్రతినిధులపై ఒత్తిడి కూడా చేసినట్లు వార్తలు వచ్చాయి.