Credit Card | బీబీపీఎస్ ఎనేబుల్ చేసుకుంటేనే స్మూత్‌గా క్రెడిట్ కార్డు బిల్లు పేమెంట్స్.. లేదంటే..?!

Credit Card | క్రెడిట్ కార్డు బిల్లుల చెల్లింపుల్లో భద్రతను పెంపొందించేందుకు జూలై ఒకటో తేదీ నుంచి క్రెడిట్ కార్డు బిల్లుల చెల్లింపులు భారత్ బిల్ పేమెంట్ సిస్టమ్ ద్వారా మాత్రమే చేయాలని ఆర్బీఐ స్పష్టం చేసింది.

June 24, 2024 / 07:18 PM IST

Credit Card | బీబీపీఎస్ ఎనేబుల్ చేసుకుంటేనే స్మూత్‌గా క్రెడిట్ కార్డు బిల్లు పేమెంట్స్.. లేదంటే..?!

Credit Card | గతంతో పోలిస్తే ఇప్పుడు ప్రతి ఒక్కరూ క్రెడిట్ కార్డు (Credit Card) వాడుతున్నారు. క్రెడిట్ కార్డు కల వారు ప్రతి నెలా ‘క్రెడిట్ బిల్లు’ పే చేయాల్సి ఉంటుంది. ఇప్పుడు అన్ని రకాల పేమెంట్స్ డిజిటల్‌గా సాగుతున్న నేపథ్యంలో అందరూ ఫోన్‌పే (PhonePe), క్రెడ్ (CRED) వంటి థర్డ్ పార్టీ యాప్స్ వినియోగిస్తున్నారు. యూపీఐ ఆధారిత మొబైల్ యాప్స్ ద్వారా అన్ని రకాల పేమెంట్స్‌ జరుగుతుండటంతో చాలా మంది వీటినే వాడుతుంటారు. ఇక నుంచి క్రెడిట్ కార్డు బిల్లులు చెల్లించడానికి ఆర్బీఐ కొత్త నిబంధన తీసుకొచ్చింది.

భారత్ బిల్ పేమెంట్ సిస్టమ్ (బీబీపీఎస్) ద్వారా క్రెడిట్ కార్డు బిల్లులు చెల్లించాలని ఆర్బీఐ తీసుకొచ్చిన కొత్త నిబంధన జూలై ఒకటో తేదీ నుంచి అమల్లోకి రానున్నది. క్రెడిట్ కార్డు బిల్లుల చెల్లింపుల్లో సెక్యూరిటీ, ఎఫిషియెన్సీ కోసం ఆర్బీఐ ఈ నిర్ణయం తీసుకున్నది. దీంతో బ్యాంకులన్నీ భారత్ బిల్ పేమెంట్ సిస్టమ్ ఎనేబుల్ చేసుకోవాలి. దేశంలో క్రెడిట్ కార్డులు జారీ చేసిన 34 బ్యాంకుల్లో భారతీయ స్టేట్ బ్యాంకు (ఎస్బీఐ), బ్యాంక్ ఆఫ్ బరోడా (బీవోబీ), కోటక్ మహీంద్రా బ్యాంక్, ఇండస్ ఇండ్ బ్యాంక్, ఫెడరల్ బ్యాంక్ సహా ఎనిమిది బ్యాంకులే ‘బీబీపీఎస్’ సిస్టమ్ యాక్టివేట్ చేసుకున్నాయి.

అయితే, దేశీయంగా అత్యధికంగా క్రెడిట్ కార్డులు జారీ చేసిన హెచ్డీఎఫ్సీ బ్యాంక్, ఐసీఐసీఐ బ్యాంక్, యాక్సిస్ బ్యాంక్ వంటి బ్యాంకులు మాత్రం ఈ ‘బీబీపీఎస్’ను యాక్టివేట్ చేసుకోలేదు. అధికారిక గణాంకాల ప్రకారం ఈ బ్యాంకులే ఐదు కోట్లకు పైగా క్రెడిట్ కార్డులు జారీ చేశాయి. ఫోన్‌పే, క్రెడ్ వంటి సంస్థలు బీబీపీఎస్‌లో సభ్యులైనా.. సంబంధిత బ్యాంకులు బీబీపీఎస్’ను యాక్టివేట్ చేసుకోకపోవడం వల్ల ఈ బ్యాంకుల క్రెడిట్ కార్డుల బిల్లులను ఫోన్‌పే, క్రెడ్ వంటి సంస్థలు ప్రాసెస్ చేయలేవు. దీనివల్ల మొబైల్ యాప్స్ ద్వారా కార్డు బిల్లు పేమెంట్ జరుగదు. కానీ సంబంధిత బ్యాంకు వెబ్ సైట్, యాప్ ద్వారా పేమెంట్స్ చేయడానికి ఇబ్బందుల్లేవు. ఈ పరిస్థితుల్లో బీబీపీఎస్ సిస్టమ్ ఏనేబుల్ చేసుకునేందుకు కనీసం 90 రోజుల గడువు పెంచాలని బ్యాంకులు ఆర్బీఐని కోరుతున్నాయి.