Big layoffs : కొత్త ఏడాదిలోనూ కొలువుల కోత కొనసాగుతున్నది. గూగుల్, మెటా, అమెజాన్ సహా పలు టెక్ దిగ్గజాలు తాజా లేఆఫ్స్ ప్రకటిస్తుండటంతో టెకీల్లో గుబులు రేగుతోంది. ఇక మైక్రోసాఫ్ట్ తాజా దశ లేఆఫ్స్ను ప్రకటించింది. యాక్టివిజన్ బ్లిజర్డ్, ఎక్స్బాక్స్ సహా గేమింగ్ డివిజన్లో లేటెస్ట్ లేఆఫ్స్ను ప్రకటించింది. మైక్రోసాప్ట్ గేమింగ్ డివిజన్లో 8 శాతం ఉద్యోగులు అంటే దాదాపు 1900 మంది ఉద్యోగులపై కంపెనీ వేటు వేయనుంది.
నూతన ప్రాజెక్టులపై దృష్టి సారించడం, కార్యకలాపాల క్రమబద్ధీకరణతో ఈ సంక్లిష్ట బాధాకర నిర్ణయం తీసుకోవాల్సి వచ్చిందని మైక్రోసాఫ్ట్ పేర్కొంది. ఈ ప్రక్రియను గేమింగ్ నాయకత్వ బృందంతో పాటు తాను సాఫీగా సాగేలా కృషి చేస్తామని మైక్రోసాఫ్ట్ గేమింగ్ సీఈవో ఫిల్ స్పెన్సర్ ఉద్యోగులకు పంపిన మెయిల్లో పేర్కొన్నారు.
లేఆఫ్స్ ప్రకంపనలు, పునర్వ్యవస్ధీకరణ ప్రక్రియ కొనసాగుతున్న వేళ బ్లిజార్డ్లో కీలక స్ధానాల్లో ఉన్న సీనియర్ ఎగ్జిక్యూటివ్లు తప్పుకున్నారు. బ్లిజార్డ్ ప్రెసిడెంట్ మైక్ బరా, చీఫ్ డిజైన్ ఆఫీసర్ అలెన్ అథమ్ కంపెనీని వీడి వెళ్లాలని నిర్ణయించుకున్నారు. వీరి నిష్క్రమణను మైక్రోసాఫ్ట్ గేమ్ కంటెంట్, స్టూడియోస్ ప్రెసిడెంట్ మ్యాట్ బూటీ నిర్ధారించారు. వచ్చేవారం బ్లిజార్డ్ నూతన ప్రెసిడెంట్ను నియమిస్తామని తెలిపారు.
Read More :