యాపిల్‌ కొత్త బాస్‌ టెర్నస్‌.. ప్రస్తుత సీఈవో టిమ్‌ కుక్‌ స్థానంలో నియామకం

గ్లోబల్‌ టెక్నాలజీ దిగ్గజం, ఐఫోన్‌ తయారీదారు యాపిల్‌కు కొత్త సీఈవో రాబోతున్నారు. ఎప్పట్నుంచో నాయకత్వ బదిలీ ప్రణాళికల్ని రచిస్తున్న సంస్థ బోర్డ్‌ ఆఫ్‌ డైరెక్టర్లు.. ఎట్టకేలకు తమ హార్డ్‌వేర్‌ ఇంజినీరింగ్‌ సీనియర్‌ ఉపాధ్యక్షుడు జాన్‌ టెర్నస్‌ను కంపెనీ నూతన చీఫ్‌ ఎగ్జిక్యూటివ్‌గా నియమించాలని నిర్ణయించారు.

• ఈ ఏడాది సెప్టెంబర్‌ 1 నుంచి బాధ్యతల్లోకి
• కంపెనీ ఎగ్జిక్యూటివ్‌ చైర్మన్‌గా కొనసాగనున్న కుక్‌

న్యూఢిల్లీ/కూపర్టినో, ఏప్రిల్‌ 21: గ్లోబల్‌ టెక్నాలజీ దిగ్గజం, ఐఫోన్‌ తయారీదారు యాపిల్‌కు కొత్త సీఈవో రాబోతున్నారు. ఎప్పట్నుంచో నాయకత్వ బదిలీ ప్రణాళికల్ని రచిస్తున్న సంస్థ బోర్డ్‌ ఆఫ్‌ డైరెక్టర్లు.. ఎట్టకేలకు తమ హార్డ్‌వేర్‌ ఇంజినీరింగ్‌ సీనియర్‌ ఉపాధ్యక్షుడు జాన్‌ టెర్నస్‌ను కంపెనీ నూతన చీఫ్‌ ఎగ్జిక్యూటివ్‌గా నియమించాలని నిర్ణయించారు. ఈ మేరకు యాజమాన్యం తాజాగా ప్రకటించింది. ఈ ఏడాది సెప్టెంబర్‌ 1న టెర్నస్‌ సీఈవో బాధ్యతల్ని స్వీకరిస్తారు. దీంతో 15 ఏండ్లుగా యాపిల్‌ సారథిగా ఉన్న టిమ్‌ కుక్‌.. మరో 5 నెలల్లో తప్పుకోనున్నారు. అప్పటిదాకా జాన్‌ టెర్నస్‌కు మార్గదర్శిగా ఉంటూ ఆయన్ను లూప్‌ లైన్‌ నుంచి మెయిన్‌ లైన్‌లోకి కుక్‌ తీసుకెళ్లనున్నారు.

ఆ తర్వాత కంపెనీ బోర్డుకు ఆయన ఎగ్జిక్యూటివ్‌ చైర్మన్‌గా వ్యవహరిస్తారు. అయితే ప్రపంచ టెక్నాలజీ మార్కెట్‌ను కృత్రిమ మేధస్సు (ఏఐ) శాసిస్తున్న ప్రస్తుత తరుణంలో యాపిల్‌ వంటి బడా కంపెనీ పగ్గాలు టెర్నస్‌ చేతికి వచ్చాయి. మరి ఈ బాధ్యతల్ని ఆయనెంత సమర్థవంతంగా నెరవేరుస్తారన్నదానిపైనే యావత్తు ఇండస్ట్రీలో ఇప్పుడు ఆసక్తి నెలకొన్నది. కాగా, యాపిల్‌ హార్డ్‌వేర్‌ బాస్‌గా ఉన్న టెర్నస్‌.. ఈ సంస్థలో చేరకముందు వర్చువల్‌ రిసెర్చ్‌ సిస్టమ్స్‌లో మెకానికల్‌ ఇంజినీర్‌గా పనిచేశారు. పెన్సిల్వేనియా విశ్వవిద్యాలయం నుంచి మెకానికల్‌ ఇంజినీరింగ్‌లో బ్యాచిలర్‌ డిగ్రీ తీసుకున్నారు.

రాబోయే సంవత్సరాల్లో మేము ఏం సాధించగలమో దానిపై నేను ఆశావాదంతో ఉన్నాను. యాపిల్‌ విజయాలను ఇకపైనా ముందుకు తీసుకెళ్తానని మాటిస్తున్నాను. కస్టమర్లు మెచ్చే రీతిలో మరెన్నో ఉత్పత్తులు, ఆవిష్కరణల్ని తీసుకొస్తాం. స్టీవ్‌ జాబ్స్‌, టిమ్‌ కుక్‌ సారథ్యంలో పనిచేయడం గొప్ప అదృష్టంగా భావిస్తున్నాను.

-జాన్‌ టెర్నస్‌, యాపిల్‌కు కాబోయే సీఈవో

టిమ్‌ కుక్‌ నాయకత్వమిది..

• 1998లో కుక్‌ యాపిల్‌లో చేరారు. 2011లో స్టీవ్‌ జాబ్స్‌ నుంచి సీఈవోగా బాధ్యతలు స్వీకరించారు.
• కుక్‌ సారథ్యంలో 108 బిలియన్‌ డాలర్ల నుంచి 416 బిలియన్‌ డాలర్లకు పెరిగిన యాపిల్‌ వార్షిక ఆదాయం.
• 350 బిలియన్‌ డాలర్ల నుంచి 4 లక్షల కోట్ల డాలర్లకు చేరిన యాపిల్‌ సంస్థ మార్కెట్‌ విలువ.
• కుక్‌ నాయకత్వంలో యాప్‌ స్టోర్‌కు విశేష ఆదరణ. ప్రస్తుత లావాదేవీలు 1.3 లక్షల కోట్ల డాలర్లపైనే.
• తయారీ, రవాణా, సరఫరాల్లో యాపిల్‌ నెట్‌వర్క్‌ను గడిచిన 15 ఏండ్లలో అత్యంత బలోపేతం చేసిన కుక్‌.
• 200 దేశాలకుపైగా విస్తరించిన యాపిల్‌ నెట్‌వర్క్‌. భారత్‌, చైనా సహా ఆయా దేశాల్లో 500కుపైగా రిటైల్‌ స్టోర్లు.
• ప్రస్తుతం ప్రపంచవ్యాప్తంగా 250 కోట్లకుపైగా వాడకంలో ఉన్న యాపిల్‌ ప్రొడక్ట్స్‌.
• యాపిల్‌ ఉత్పత్తుల్లో విరివిగా వాడుతున్న ఎమ్‌-సిరీస్‌ చిప్‌ కుక్‌ ఆవిష్కరణల్లో ఒకటే.
• కుక్‌ హయాంలోనే స్మార్ట్‌ వాచీలు, ఎయిర్‌పాడ్స్‌, విజన్‌ ప్రో, ఐక్లౌడ్‌, యాపిల్‌ పే, టీవీ, మ్యూజిక్‌ తదితర ఉత్పత్తులు, సేవల్లోకి యాపిల్‌. -2015లో వచ్చిన యాపిల్‌ స్మార్ట్‌వాచీలో ఈసీజీ మానిటరింగ్‌, రక్తంలో ఆక్సీజన్‌ పరిమాణం వంటి సదుపాయాలు.
• ఫోర్బ్స్‌ లెక్కల ప్రకారం టిమ్‌ కుక్‌ సంపద విలువ 2.9 బిలియన్‌ డాలర్లు (రూ.27వేల కోట్లపైనే).

జాన్‌ టెర్నస్‌ ప్రయాణమిది..

• 2001లో యాపిల్‌ ప్రొడక్ట్‌ డిజైన్‌ బృందంలో చేరిన టెర్నస్‌. 2013లో హార్డ్‌వేర్‌ ఇంజినీరింగ్‌ ఉపాధ్యక్షుడిగా బాధ్యత.
• 2021లో హార్డ్‌వేర్‌ ఇంజినీరింగ్‌ సీనియర్‌ ఉపాధ్యక్షుడిగా ఎగ్జిక్యూటివ్‌ టీమ్‌లోకి.
• ఐపాడ్‌, ఎయిర్‌పాడ్స్‌, ఐఫోన్‌, మ్యాక్‌, స్మార్ట్‌ వాచీల తయారీలో కీలకపాత్ర.
• ఇటీవలి ఐఫోన్‌ 17ప్రో, ప్రో మ్యాక్స్‌, అల్ట్రా థిన్‌ ఐఫోన్‌ ఎయిర్‌, అప్‌గ్రేడ్‌ ఐఫోన్‌ 17 అభివృద్ధిలో భాగస్వామి.
• ఎయిర్‌పాడ్స్‌లో యాక్టీవ్‌ నాయిస్‌ క్యాన్సిలేషన్‌ను మెరుగుపర్చిన టెర్నస్‌.
• యాపిల్‌ వాచీ అల్ట్రా 3లో రీసైకిల్డ్‌ అల్యూమినియం, 3డీ ప్రింటెడ్‌ టైటానియం వినియోగం వెనుక సూత్రధారి.
• పర్యావరణ హిత ఆలోచనలతో నూతన ఆవిష్కరణలకు శ్రీకారం చుడుతున్న జాన్‌ టెర్నస్‌.

యాపిల్‌ను నేను ఎప్పుడూ ఇష్టపడుతూనే ఉంటాను. అత్యుత్తమ ఉత్పత్తుల్ని, సేవల్ని అందిస్తూ ప్రపంచవ్యాప్తంగా యాపిల్‌ వినియోగదారులను సంతృప్తిపరుస్తున్న ఎంతో తెలివైన, సృజనాత్మకతతోకూడిన సిబ్బందితో పనిచేయడం నాకు దక్కిన గొప్ప అవకాశం. అందుకు నాకు చాలా ఆనందంగా ఉన్నది.

-టిమ్‌ కుక్‌, యాపిల్‌ను వీడుతున్న సీఈవో