విటమిన్‌ – బ్యూటీ!

చర్మం నిగారింపుతో మెరిసిపోవాలని అందరికీ ఉంటుంది. ఆ మక్కువకొద్దీ మార్కెట్లో దొరికే రకరకాల క్రీములు వాడతారు. కానీ, సౌందర్యాన్ని కోరుకునేవారంతా ముందుగా చేయాల్సిన పని..

చర్మం నిగారింపుతో మెరిసిపోవాలని అందరికీ ఉంటుంది. ఆ మక్కువకొద్దీ మార్కెట్లో దొరికే రకరకాల క్రీములు వాడతారు. కానీ, సౌందర్యాన్ని కోరుకునేవారంతా ముందుగా చేయాల్సిన పని..చర్మానికి అవసరమయ్యే విటమిన్లు ఏమిటన్నది తెలుసుకోవడం. ఆయా విటమిన్లు పుష్కలంగా ఉన్న ఉత్పత్తులనే ఉపయోగించాలి.

మొటిమలు
శరీరంపై మొటిమలు రాకుండా విటమిన్‌-ఎ ఉపకరిస్తుంది. ముఖ చర్మంపై శరీరం విడుదల చేసే నూనెలను ఇది నియంత్రిస్తుంది. జిడ్డు చర్మం ఉన్న వాళ్లకు విటమిన్‌-ఎ చాలా మేలు చేస్తుంది.
విటమిన్‌-ఎ లభించే క్రీములు వాడుతూ పాల పదార్థాలు, చేపలు, ముదురు రంగు పండ్లు, కూరగాయలు ఆహారంలో చేర్చుకోవాలి.

ముడతలు
రోగ నిరోధక శక్తిని పెంచుకోవడానికి విటమిన్‌-సి నిండుగా ఉన్న పండ్లు, కూరగాయలు తినాలని నిపుణులు చెబుతారు. అందువల్ల 3-10 శాతం విటమిన్‌-సి ఉన్న క్రీములు పూస్తే చర్మంపై ముడతలు తగ్గుతాయి. ముందునుంచే వాడుతూ ఉంటే.. అసలు రాకుండా జాగ్రత్తపడవచ్చు. ఎండవల్ల కలిగే సమస్యలకూ విటమిన్‌-సి అడ్డుకట్ట వేస్తుంది. విటమిన్‌-సి జోడించిన మాయిశ్చరైజర్‌, సన్‌స్క్రీన్‌ లోషన్‌ హానికరమైన అతినీల లోహిత కిరణాల నుంచి చర్మాన్ని కాపాడతాయి.

పొడి చర్మం
చర్మం పొడిబారడం, గరుకుగా ఉండటం, పెచ్చులు ఊడటం.. మొదలైన సమస్యలు ఉన్నప్పుడు విటమిన్‌-ఇ చక్కని పరిష్కారం. విటమిన్‌-ఇ లభించే సన్‌స్క్రీన్‌ లోషన్లు, మాయిశ్చరైజర్లను వాడితే చర్మం పొడిబారదు.

దురద-తామర
చర్మ సమస్యలైన తామర, సోరియాసిస్‌తో బాధపడేవారికి విటమిన్‌-డి ఉన్న పైపూతలు ఉపశమనం కలిగిస్తాయి. క్రమం తప్పకుండా వాడితే మంట, దురద తగ్గిపోతాయి.

నల్లటి వలయాలు
కళ్ల చుట్టూ నల్లటి వలయాలతో చాలామంది ఇబ్బందిపడుతుంటారు. అలాంటివాళ్లు విటమిన్‌-కె ఉన్న ఐ క్రీములు వాడితే సమస్య దూరం అవుతుందని నిపుణులు చెబుతున్నారు.