Srirama navami | మార్చి 30, 31వ తేదీల్లో తిరుమలలో శ్రీరామనవమి ఉత్సవాలు

Srirama navami | తిరుమల శ్రీవారి ఆలయంలో మార్చి 30, 31వ తేదీల్లో శ్రీరామనవమి శ్రీరామ పట్టాభిషేకం వేడుకలను నిర్వహిస్తున్నామని టీటీడీ అధికారులు వెల్లడించారు.

తిరుమ‌ల‌ : తిరుమల శ్రీవారి ఆలయంలో మార్చి 30, 31వ తేదీల్లో శ్రీరామనవమి(Srirama navami), శ్రీరామ పట్టాభిషేకం వేడుకలను నిర్వహిస్తున్నామని టీటీడీ అధికారులు( ttd officials) వెల్లడించారు. మార్చి 30న ఉదయం 9 నుంచి 11 గంటల వరకు రంగ‌నాయ‌కుల మండ‌పంలో శ్రీ సీతా లక్ష్మణ ఆంజనేయ సమేత శ్రీరామచంద్రమూర్తి వారి ఉత్సవర్లకు స్నపన తిరుమంజనం నిర్వహిస్తామన్నారు. ఇందులో పాలు, పెరుగు, తేనె, కొబ్బరినీళ్లు, పసుపు, చందనంతో అభిషేకం చేస్తారని వివరించారు.

సాయంత్రం 6:30 నుంచి 8 గంట‌ల వ‌ర‌కు హ‌నుమంత వాహ‌నసేవ( hanmantha seva) జ‌రుగుతుందన్నారు. ఆ త‌రువాత రాత్రి 9 నుండి 10 గంటల నడుమ బంగారువాకిలి చెంత శ్రీరామనవమి ఆస్థానాన్ని వేడుకగా నిర్వహిస్తామన్నారు. ఈ కార‌ణంగా స‌హ‌స్రదీపాలంకార సేవ‌ను ర‌ద్దు చేసినట్లు తెలిపారు. మార్చి 31న రాత్రి 8 నుంచి 9 గంటల వరకు బంగారువాకిలి చెంత ఆలయ అర్చకులు శ్రీరామ పట్టాభిషేక మహోత్సవం నిర్వహిస్తామని తెలిపారు.