Madanapalle Incident | మదనపల్లె ఫైళ్ల దగ్ధం కేసులో పురోగతి.. పోలీసుల అదుపులో మాజీ మంత్రి పీఏ .. కీలక దస్త్రాలు స్వాధీనం

Madanapalle Incident | ఏపీలోని అన్నమయ్య జిల్లా మదనపల్లె సబ్‌ కలెక్టర్‌ కార్యాలయంలో దస్త్రాల దహనం కేసులో పోలీసులు కీలక పురోగతి సాధించారు.

అమరావతి : ఏపీలోని అన్నమయ్య జిల్లా మదనపల్లె సబ్‌ కలెక్టర్‌ కార్యాలయంలో దస్త్రాల దహనం కేసులో పోలీసులు కీలక పురోగతి సాధించారు. మాజీ మంత్రి పెద్దిరెడ్డి (Peddireddy) వ్యక్తిగత సహాయకుడు శశిధర్‌(PA Shasidhar) ను ఏపీ పోలీసులు(Police) హైదరాబాద్‌లో అదుపులోకి తీసుకుని నాలుగు పెట్టెల దస్త్రాలను స్వాధీనం చేసుకున్నారు.

ఈనెల 21న రాత్రి మదనపల్లె సబ్‌ కలెక్టర్‌ కార్యాలయంలో అగ్నిప్రమాదం జరిగి దస్త్రాలు దగ్ధమయ్యాయి. ఈ ఘటనను సీరియస్‌గా తీసుకున్న ముఖ్యమంత్రి చంద్రబాబు పోలీస్‌, రెవెన్యూ, అగ్నిమాపక శాఖలకు చెందిన ఉన్నతాధికారులను అప్రమత్తం చేశారు. వెంటనే ఘటనా స్థలానికి వెళ్లి విచారణ జరిపి నివేదికను అందించాలని ఆదేశాలు జారీ చేయడంతో మూడు శాఖలకు చెందిన అధికారులు వారం రోజులుగా కేసును ఛేదించేందుకు తీవ్రస్థాయిలో కసరత్తులు చేస్తున్నారు.

దీంట్లో భాగంగా ఆదివారం నాడు హైదరాబాద్‌(Hyderabad) లోని మాదాపూర్‌ అయ్యప్ప సొసైటీలో మాజీ ఎమ్మెల్యే ఇంట్లో నివాసముంటున్న వైసీపీ నాయకుడు, మాజీ మంత్రి పెద్దిరెడ్డి వ్యక్తిగత సహాయకుడైన శశిధర్‌ను ఏపీ పోలీసులు అదుపులోకి తీసుకున్నారు. దాదాపు 8 గంటల పాటు సోదాలు చేసి, విచారించి అతడి ఇంట్లో ఉన్న నాలుగు పెట్టెల దస్త్రాలను వెంట తీసుకొని వెళ్లారు.