Chandrababu | తప్పులు చేస్తే వైసీపీకి పట్టిన గతే టీడీపీకి పడుతుంది : చంద్రబాబు

Chandrababu | వైసీపీ(YCP) హయాంలో జరిగిన తప్పులను తెలుగు తమ్ముళ్లు కూడా చేస్తే ఎన్నికల్లో వారికి పట్టిన గతే టీడీపీకి పడుతుందని, జాగ్రత్తగా ఉండాలని టీడీపీ అధినేత, ఏపీ సీఎం చంద్రబాబు హెచ్చరించారు.

అమరావతి : వైసీపీ(YCP) హయాంలో జరిగిన తప్పులను తెలుగు తమ్ముళ్లు కూడా చేస్తే ఎన్నికల్లో వారికి పట్టిన గతే టీడీపీకి పడుతుందని, జాగ్రత్తగా ఉండాలని టీడీపీ అధినేత, ఏపీ సీఎం చంద్రబాబు (Chandrababu) హెచ్చరించారు. మంగళగిరిలోని టీడీపీ(TDP) కేంద్ర కార్యాలయంలో పార్టీ ఎమ్మెల్యేలు, ఎంపీలు, ఎమ్మెల్సీల సమావేశంలో చంద్రబాబు మాట్లాడారు.

ప్రతి ఒక్కరికీ క్రమ శిక్షణ ముఖ్యమని, ప్రజలు మనల్ని అనుమానించే పరిస్థితి రాకూడదని వెల్లడించారు. మనం చేసే మంచి పనులే వచ్చే ఎన్నికలకు ఉపయోగపడుతాయిని పేర్కొన్నారు. ఎన్ని అరాచకాలు చేయకపోతే వైసీపీ 11 స్థానాలకు పడిపోయిందో గ్రహించాలన్నారు. టీడీపీ కూడా అదే తీరున వెళ్తే రాష్ట్రం మళ్లీ రావణకాష్టమే అవుతుందని అన్నారు.

కూటమిలో ఎవరూ తప్పుచేసినా ఆ ప్రభావం సీఎంపై ఉంటుందని గుర్తించాలని సూచించారు. తప్పు చేస్తే ఎవరినీ వదిలి పెట్టబోమని, అలాగని కక్షసాధింపులకు వెళ్లకూడదని సూచించారు. కొత్తగా మద్యం(Liquor) లో వేలు పెడతామంటే కుదరదని అన్నారు. మద్యం, ఇసుక విధానాలపై మళ్లీ విడిగా అందరితో మాట్లాడతానని చెప్పారు. ప్రభుత్వం తీసుకొచ్చిన సూపర్‌ సిక్స్‌ పాలసీలు గేమ్‌ ఛేంజర్‌ కానున్నాయని అన్నారు. 2029లో మళ్లీ గెలవాలంటే ఎన్డీయేను అనుసంధానం చేసుకోవాలని తెలిపారు. సంఘటిత శక్తిగా పనిచేస్తేనే ప్రజల అంచనాలను అందుకోగలమని తెలిపారు.