Y.S. Sharmila | ఎన్నికల్లో విజయం ప్రజా తీర్పు కాదు..అధికార మదంతో బలవంతపు గెలుపు : వైఎస్‌ షర్మిల

Y.S. Sharmila | ఏపీ కాంగ్రెస్‌ కమిటీ అధ్యక్షురాలు వైఎస్‌ షర్మిల కూటమి పాలనపై సంచలన వ్యాఖ్యలు చేశారు.

అమరావతి : ఏపీ కాంగ్రెస్‌ కమిటీ అధ్యక్షురాలు వైఎస్‌ షర్మిల (Y.S. Sharmila) కూటమి పాలనపై సంచలన వ్యాఖ్యలు చేశారు. మున్సిపల్‌ ఎన్నికల ఫలితాల ( Election Results ) పై ట్విటర్‌ వేదికగా ఆమె ఘాటుగా స్పందించారు. ఎన్నికల్లో ఓట్లు మీరే వేసుకున్నారు. గెలుపు ( Election victory) మీదేనని ప్రకటించుకున్నారు. ఇంకా ప్రజలతో, ప్రజాస్వామ్యంతో పనేంటి ? అని ప్రశ్నించారు.

టీడీపీ, జనసేన, బీజేపీ పార్టీల విజయం ప్రజా తీర్పు కాదని, అధికార మదానికి, రాక్షస తత్వానికి తార్కాణమని విమర్శించారు. కూటమి పార్టీల నిజమైన జయభేరి కాదని, ప్రజల గొంతు నొక్కి, ప్రతిపక్షాలను అణచివేసి, సాధించిన బలవంతపు గెలుపని అన్నారు.  ఎన్నికల సంఘాన్ని కూటమి సంఘంగా చేసి, పోలీసు వ్యవస్థను గుప్పిట్లోకి తీసుకుని, ఈ దేశ ఎన్నికల వ్యవస్థకే సరికొత్త నిర్వచనం చెప్పారని దుయ్యబట్టారు. దేశం ముంగిట రాష్ట్రం పరువు తీసినందుకు కూటమి పార్టీలు సిగ్గుపడాలని అన్నారు.

రౌడీలను, గూండాలను పెట్టి బలవంతపు ఏకగ్రీవాలకు పాల్పడ్డాడని ఆరోపించారు. ప్రతిపక్ష అభ్యర్థులను తన్ని తరిమేసి, ఎన్నికలు జరిగిన చోట దౌర్జన్యాలతో బ్యాలెట్ బాక్సులను తమ ఆధినంలోకి తీసుకున్నారని, ఓటు వేయకుండా ప్రజలను భయభ్రాంతులకు గురిచేశారని ఆరోపించారు. ఓటరు తీర్పును తిరగరాసే ఇలాంటి చర్యలు ప్రజాస్వామ్య మనుగడకే గొడ్డలిపెట్టని, వ్యవస్థల విధ్వంసానికి పరాకాష్ట అని పేర్కొన్నారు.