‘కేన్స్‌’ ఫెస్టివల్‌లో మన డిజైన్స్‌

ఫ్యాషన్‌ డిజైనర్ల మిఠాయి స్వప్నం.. అంతర్జాతీయ వేదికలపై తమ డిజైన్స్‌ను ప్రదర్శించడం. హైదరాబాద్‌కు చెందిన ఫ్యాషన్‌ డిజైనర్‌ అరుణ గౌడ్‌ ఆ స్వప్నాన్ని నిజం చేసుకున్నారు. ఇటీవల జరిగిన కేన్స్‌ ఫిల్మ్‌ ఫెస్టివల్‌- 2021లో ఆమె డిజైన్‌ ప్రత్యేక ముద్రను సృష్టించింది. అరుణ రూపొందించిన డ్రెస్‌ను ధరించి, ఫ్రెంచి నటి నటాచా కోస్టా రెడ్‌ కార్పెట్‌పై సందడి చేశారు. నలుపు, ఊదా రంగుల్లోని రఫెల్డ్‌ గౌన్‌ చూపరులను ఆకట్టుకున్నది. డిజైనర్‌ అరుణ గౌడ్‌ ‘అల్మారా’ లేబుల్‌ బ్రాండ్‌ సృష్టికర్త. కొన్నేండ్లుగా వివిధ ఫ్యాషన్‌ వీక్స్‌లో పాల్గొంటున్నారు. ఇండో- వెస్టర్న్‌, బ్రైడల్‌ వేర్‌ అరుణ ప్రత్యేకతలు. కొవిడ్‌ కారణంగా ఈ ఏడాది కేన్స్‌ ఫిల్మ్‌ ఫెస్టివల్‌కు తాను వెళ్లలేకపోయినా, ‘అల్మారా’ డిజైన్‌ చేసిన డ్రెస్‌ రెడ్‌ కార్పెట్‌మీద సందడి చేయడం గొప్ప విజయమని అరుణ అంటున్నారు. కొలంబోలో జరుగనున్న ‘బ్రైడ్స్‌ ఆఫ్‌ శ్రీలంక’ ప్రోగ్రామ్‌లో ఇంటర్నేషనల్‌ డిజైనర్‌ హోదాలో అరుణ గౌడ్‌ పాల్గొననున్నారు.