బరువు తక్కువ బిడ్డలు!

తల్లి పోషకాహార లోపాలతోనో, అనారోగ్యంతోనో బాధపడుతుంటే.. పుట్టబోయే శిశువు నిండుగా తొమ్మిది నెలలు గర్భంలో ఉన్నా సరే, పెరుగుదల లోపిస్తుంది. తక్కువ బరువుతోనే జన్మిస్తుంది. సాధారణ బరువుతో జన్మించిన పిల్లలతో పోలిస్తే.. ఏడాది దాటేలోపు మరణించే ఆస్కారమూ ఎక్కువని అధ్యయనాలు హెచ్చరిస్తున్నాయి.

నెలలు నిండినా, బరువు తక్కువగా పుట్టిన శిశువులలో 3 రకాలు..

1. పొడవు సరిగ్గా ఉన్నా, బరువు తక్కువ
   శరీరంలో కొవ్వు తక్కువగా ఉండటం వల్ల చర్మం వదులుగా, వేలాడుతున్నట్టు ఉంటుంది. స్థన్యం ఇచ్చే తల్లి సరైన పోషకాహారం తీసుకొంటేనే.. శిశువు ఆరోగ్యంగా పెరుగుతుంది. నిండు చూలాలికి పోషకాహారలోపం ఇంకా ప్రమాదకరం.
2. పొడవు, బరువు రెండూ తక్కువ
   గర్భం ప్రథమ దశలో ఉన్నప్పుడు తల్లికి అంటువ్యాధులు సోకినా, ఆ తల్లికి జన్యుపరమైన లోపాలు ఉన్నా శిశువు పొడవు, బరువు.. రెండూ తక్కువగా ఉంటాయి.
3. మిశ్రమం
   పిండంపై దుష్ప్రభావం అన్ని దశల్లోనూ ఉంటుంది. శిశువు చాలా చిన్నగా, సన్నగా ఉంటుంది.
   తక్కువ బరువుతో జన్మించిన శిశువులకు భవిష్యత్తులో రక్తపోటు, మధుమేహం వచ్చే ఆస్కారం ఎక్కువ. గర్భధారణకు ముందు స్త్రీ బరువు 40 కిలోల కంటే తక్కువ ఉన్నా, ఎత్తు 145 సెంటీ మీటర్ల కన్నా తక్కువ ఉన్నా, బరువు తక్కువ శిశువు జన్మించే ఆస్కారం ఎక్కువ.
   గర్భధారణ సమయంలో కనీసం 7 కిలోల బరువు పెరగకపోయినా, బరువు తక్కువ శిశువులు జన్మించే ప్రమాదం అధికం. గర్భిణికి సరైన ఆహారం ఇవ్వడం ద్వారా బరువు తక్కువ శిశు జననాలను సగానికిసగం నివారించవచ్చని అధ్యయనాలు చెబుతున్నాయి.

డాక్టర్‌ కర్రా రమేష్‌రెడ్డి
పిల్లల వైద్య నిపుణులు