నా పుట్టిల్లు, మెట్టిల్లు రెండూ హైదరాబాదే. పెండ్లయిన కొంతకాలానికే దక్షిణాఫ్రికాలోని కేప్టౌన్కు మకాం మార్చాం. మేమిద్దరమూ దాంపత్యానికి చాలాకాలం నుంచీ దూరంగా ఉంటున్నాం. అతనో శాడిస్టు. నిత్యం దూషణలకు గురవుతూ మానసిక క్షోభను అనుభవిస్తున్నాను. గత ఐదు నెలలుగా నా భర్త మరో నగరంలో ఉంటున్నాడు. నేనూ ఒంటరిగా జీవిస్తున్నా. విడాకులు తీసుకునేందుకు కుటుంబ సభ్యులు అంగీకరించడం లేదు. వాళ్ల ఒత్తిడి కారణంగానే చాలాకాలం నుంచీ భారతదేశానికి రావడానికి వెనుకాడుతున్నాను. కేప్టౌన్లో ఉంటూనే నేను విడాకులు పొందవచ్చా? విడాకులకు నా భర్త అంగీకరించకపోతే, వేరే దారులేమైనా ఉన్నాయా? దయచేసి నాకు మార్గం చూపండి.
ఓ ముస్లిం సోదరి
జ: మీ వివాహాన్ని భారతదేశం గుర్తించినట్లయితే మీ పెండ్లి, విడాకుల విషయంలో ఇక్కడి చట్టాలు వర్తిస్తాయి. మీరు నిరభ్యంతరంగా భారతదేశంలో విడాకులకు దరఖాస్తు చేసుకోవచ్చు. కాకపోతే, కేసు ఫైల్ చేయడానికి ఇక్కడ ఒక అడ్వకేట్ను ఏర్పాటు చేసుకోవాల్సి ఉంటుంది. అలాగే, దక్షిణాఫ్రికాలోని స్థానిక చట్టాలనూ ఒకసారి లోతుగా పరిశీలించాలి. ఒకవేళ అక్కడి న్యాయస్థానాలు విదేశీ పెండ్లిళ్లకు విడాకులు ఇచ్చేందుకు అంగీకరిస్తే, మీరు అక్కడే తీసుకోవచ్చు. అంతేకాదు, మీ భర్త విడాకులకు అంగీకరించపోతే, కంటెస్టెడ్ డైవోర్స్కు దరఖాస్తు చేసుకోవచ్చు. ముస్లిం విడాకుల చట్టానికి, హిందూ విడాకుల చట్టానికి చాలా తేడాలు ఉంటాయి. కుటుంబ సభ్యుల ఒత్తిడివల్ల భారతదేశానికి రాకుండా అక్కడి నుంచే విడాకులు తీసుకోవాలని అనుకుంటే, హైదరాబాద్లో ఒక లాయర్ను పెట్టుకోవాలి. వకాలత్నామా వంటి డాక్యుమెంట్లను మీ లాయర్కు కొరియర్ చేయాల్సి ఉంటుంది. అడ్వకేట్లు అడిగితే, వీడియో కాన్ఫెరెన్స్ ద్వారా వర్చువల్ హియరింగ్స్కు కోర్టు మొగ్గుచూపుతుంది. మీకు కోర్టు నుంచి అనుమతి లభిస్తే కనుక, దక్షిణాఫ్రికా నుంచే విడాకుల కేసును నడిపించుకోవచ్చు. భయపడాల్సిన పన్లేదు.
మానసి చౌదరి
అడ్వకేట్
www.pinklegal.in