క్యాప్సుల్స్‌లో ఫిల్టర్‌ కాఫీ

‘కప్పు కాఫీ లభించుటే గొప్ప లక్కు’ అని కాఫీ దండకమే రాసేశారో కవి. ఇంట్లో ఉంటే.. కావాల్సినప్పుడు కాఫీ అందుతుంది కానీ, ప్రయాణాల్లో అన్ని వేళలా దొరక్కపోవచ్చు. అందులోనూ ఫిల్టర్‌ కాఫీ గగనమే. సమయానికి ‘చుక్క’ పడక రసాభాస చేసేస్తుంటారు కొందరు. ఇలాంటి వారి కోసమే ఫిల్టర్‌ కాఫీ పిల్స్‌ను తయారు చేశారు ఎర్నాకులానికి చెందిన నలుగురు విద్యార్థినులు. ఇంటర్‌ చదువుతున్న ఈ విద్యార్థినులు టై గ్లోబల్‌ సంస్థ నిర్వహించిన బిజినెస్‌ కాన్సెప్ట్‌ పోటీలో చిక్కటి కాఫీ లాంటి ఐడియాతో పాల్గొన్నారు. ఫిల్టర్‌ కాఫీని క్యాప్సుల్స్‌ రూపంలో సృష్టించి విజేతలుగా నిలిచారు. టై గ్లోబల్‌ నుంచి ‘పాపులర్‌ చాయిస్‌’ అవార్డునూ గెలుచుకున్నారు.. సౌందర్య లక్ష్మి, ఎలిషా అనోరి, డింపుల్‌, శివనందన. దేశదేశాలకు చెందిన విద్యార్థులు పాల్గొన్న ఈ పోటీలో ఈ నలుగురు అమ్మాయిల కాన్సెప్ట్‌ అందరి మన్ననలూ అందుకుంది. ఎర్నాకులం బాలికల హయ్యర్‌ సెకండరీ పాఠశాలలో ఇంటర్‌ చదువుతున్న నలుగురూ కళాశాలలోనే ప్రయోగాలు చేసి ఫిల్టర్‌ కాఫీని క్యాప్సుల్స్‌గా మలిచారు. వీటిని వేడినీళ్లలో వేసి అరనిమిషం ఉంచితే చాలు, రుచికరమైన కాఫీ సిద్ధమవుతుంది. ప్రయాణాలప్పుడు పది క్యాప్సుల్స్‌ బ్యాగులో వేసుకుంటే సరి. ఎక్కడైనా కాఫీ తాగేయొచ్చు. తమ ఐడియాకు అవార్డు రావడం సంతోషంగా ఉందన్నారు నలుగురూ. కాఫీ క్యాప్సుల్స్‌ తయారీకి లైసెన్స్‌ కోసం దరఖాస్తు చేశామన్నారు. ఇంటర్‌ పూర్తయ్యాక బిజినెస్‌ వెంచర్‌ ప్రారంభిస్తామని చెబుతున్నారు.