చెమటతో చిక్కులు

వేసవిలో చెమట ఇట్టే పట్టేస్తుంది. నాలుగు అడుగులు వేసినా.. చిన్నచిన్న పనులు చేసినా.. దుస్తులన్నీ తడిసిపోతాయి. అయితే, కొందరు చెమట పట్టిన అవే దుస్తులతోనే ఉండిపోతారు. దీనివల్ల చర్మానికి అనేక సమస్యలు వచ్చే అవకాశం ఉన్నదని నిపుణులు చెబుతున్నారు.

వేసవిలో చెమట ఇట్టే పట్టేస్తుంది. నాలుగు అడుగులు వేసినా.. చిన్నచిన్న పనులు చేసినా.. దుస్తులన్నీ తడిసిపోతాయి. అయితే, కొందరు చెమట పట్టిన అవే దుస్తులతోనే ఉండిపోతారు. దీనివల్ల చర్మానికి అనేక సమస్యలు వచ్చే అవకాశం ఉన్నదని నిపుణులు చెబుతున్నారు. చెమట వల్ల దుస్తులు తడిసినప్పుడు.. ఆ తేమలో బ్యాక్టీరియా, ఫంగస్‌ వేగంగా పెరుగుతాయి. దీనివల్ల చర్మం ముడతలు పడే చోట తామర, దురద వంటి సమస్యలు తలెత్తుతాయి. తడి వస్ర్తాలు చర్మానికి అంటుకుని ఉండటం వల్ల స్వేద గ్రంథులు మూసుకుపోతాయి.

దీనివల్ల చర్మంపై ఎర్రటి పొక్కులు, చెమటకాయలు ఏర్పడతాయి. మంట, దురద కలిగిస్తాయి. వీపు, ఛాతీ భాగంలో మొటిమలు వస్తాయి. చెమట, ధూళితోపాటు చర్మంపై ఉండే మృతకణాలు కలిసి చర్మరంధ్రాలను మూసివేయడం వల్ల ‘బాడీ ఆక్నే’ ఏర్పడుతుంది. కాబట్టి, వ్యాయామం చేసినా, బయట ఎండలో తిరిగి వచ్చినా.. వీలైనంత త్వరగా స్నానం చేయడం మంచిది. వేసవిలో శరీరానికి గాలి బాగా ఆడేలా.. కాటన్‌ దుస్తులు ధరించాలి. ఇవి చెమటను త్వరగా పీల్చుకుంటాయి. వేసవిలో బ్యాక్టీరియాను నివారించే సబ్బులు, స్నానానికి వేప నీటిని వాడటం బెటర్‌.