ప్ర‌తిదానికి ఆల‌స్యంగానే వెళ్తున్నారా? అయితే ఈ డిజార్డ‌ర్ నుంచి ఇలా బ‌య‌ట‌ప‌డండి

Latecomers  | కాలేజి, ఆఫీస్‌, ఫంక్షన్‌.. ఎక్కడికైనా సరే, కొంతమంది ఎప్పుడూ ఆలస్యమే. ఆ కార్యక్రమానికి హాజరైన చిట్టచివరి వ్యక్తి మనమే అయినప్పుడు నామోషీగానే అనిపిస్తుంది. ఒత్తిడికి గురవుతాం. ఆ అకారణ ఆలస్యాన్ని అధిగమించడానికి కొన్ని చిట్కాలు..

ఆలస్యం అనేది ఒక దీర్ఘకాలిక సమస్య. లేట్‌ కమర్స్‌.. ప్రతిసారీ ఒక కారణాన్ని వెతుక్కుంటారు. ఏడీహెచ్‌డీ (అటెన్షన్‌ డెఫిసిట్‌ లేదా హైపర్‌ యాక్టివిటీ డిజార్డర్‌) ఉన్నవాళ్లలో ఈ జాడ్యం ఎక్కువగా కనిపిస్తుంది. ఇవేవీ లేకపోయినా కొంతమంది అన్నిచోట్లకూ ఆలస్యం అవుతుంటారు. కొన్ని జాగ్రత్తలతో ఈ ఇబ్బందిని అధిగమించడం సులభమే.

› బయటికి వెళ్లేప్పుడు అవసరమైన వస్తువులన్నీ ఒక దగ్గర పెట్టుకోండి. దీనివల్ల చివరి నిమిషంలో తాళాల కోసమో, పర్సు కోసమో, కళ్లద్దాల కోసమో, కర్చీఫ్‌ కోసమో వెతుక్కోవాల్సిన పనుండదు. సమయం కలిసొస్తుంది కూడా.

› రేపు ఫంక్షన్‌కు వేసుకోవాలనుకున్న దుస్తులు, నగలు కూడా ముందురోజు రాత్రే తీసిపెట్టుకోండి. దుస్తులు, మ్యాచింగ్‌ దుద్దుల్లాంటివి పెట్టుకుని చూసుకుంటే మరీ మంచిది. తీరా వెళ్లేముందు ఫిట్టింగ్‌ సరిగా లేదనో, సరైన క్లిప్‌ దొరకలేదనో గొణుక్కోవాల్సిన పరిస్థితి ఉండదు.

› బయటికి వెళ్లాలనుకున్నప్పుడు ఫోన్‌ ముట్టుకోకండి. ఇన్‌స్టాలో ఇంటరెస్టింగ్‌ పోస్ట్‌ వచ్చిందనో, ఫేస్‌బుక్‌లో ఎవరికో శుభాకాంక్షలు చెబుదామనో ఒక్క నిమిషం కోసం ఫోన్‌ ముట్టుకున్నామంటే, అక్కడే గంట సమయం వృథా అవుతుంది.

› వెళ్లాలనుకున్న చోటికి.. అనుకున్న సమయానికన్నా ఇరవై నిమిషాల ముందే చేరిపోండి. ఖాళీ సమయాన్ని పుస్తకం చదువుతూనో, కాఫీ తాగుతూనో సద్వినియోగం చేసుకోవచ్చు.

› బయల్దేరే ముందు పక్కబట్టలు సర్దడం, సోఫా మీద ఉన్న బట్టలు మడతేసి లోపల పెట్టాలనుకోవడం, అప్పుడే తాగిన కాఫీ కప్పును కడిగేయడం.. మరింత ఆలస్యానికి దారితీసే పనులు. ఇల్లు కదలడం కష్టమైనవారే చివరి నిమిషంలో ఇలా చేస్తుంటారని మానసిక నిపుణులు చెబుతున్నారు.

› పనిమీద వెళ్లే చోటు ఏదో, ఎంత దూరంలో ఉందో, అక్కడికి వెళ్లడానికి ఎంత సమయం పడుతుందో.. ముందుగానే తెలుసుకోండి. దీనివల్ల ఎన్నింటికి బయలుదేరితే సమయానికి చేరుకోగలమనే దానిపై స్పష్టత వస్తుంది. తీరా వెళ్లాక, సారీ చెప్పాల్సిన ఇబ్బందీ తప్పుతుంది.

Read More :

మొటిమ‌లు త‌గ్గి చ‌ర్మం మెర‌వాలా? అయితే వీటి గురించి తెలుసుకోండి