హైదరాబాద్ సిటీబ్యూరో, జూన్ 16 (నమస్తే తెలంగాణ): సినీ నిర్మాత కేపీ చౌదరి అరెస్టుతో సినీ పరిశ్రమలోని కొంత మంది గుండెల్లో రైళ్లు పరుగెడుతున్నాయి. గోవా నుంచి తీసుకొచ్చిన 100 గ్రాము ల కొకైన్ను కిస్మత్పూర్ పరిసరాల్లో అమ్మేందుకు యత్నిస్తూ 14న పోలీసులకు దొరికిపోగా, అతడి వద్ద 4 సెల్ఫోన్లను స్వాధీనం చేసుకున్నారు. దర్యాప్తులో భాగంగా కాల్ లిస్ట్, వాట్సాప్ చాటింగ్, మెసేజ్లను పరిశీలించగా కీలక సమాచారం దొరికినట్టు తెలిసింది.
కేపీ చౌదరి నగరంలోని ఓ పబ్బులో పార్టీలు నిర్వహిస్తూ, కొకైన్ సరఫరా చేస్తుండేవాడని పోలీసులు గుర్తించినట్టు సమాచారం. ఆ పార్టీల్లో పాల్గొన్నవారి జాబితాను తయారుచేసినట్టు విశ్వసనీయంగా తెలిసింది. ఆ జాబితాలో పలువురు ప్రముఖులు ఉన్నట్టు, వారికి నోటీసులు ఇచ్చేందుకు సన్నాహాలు చేస్తున్నట్టు సమాచారం. మరిన్ని వివరాలు సేకరించేందుకు చౌదరి కస్టడీ కోరుతూ రాజేంద్రనగర్ పోలీసులు కోర్టులో శుక్రవారం పిటిషన్ దాఖలు చేశారు. విచారించిన న్యాయస్థానం తీర్పును సోమవారానికి వాయిదా వేసింది.