పోలీసు అభ్యర్థులకు శుభవార్త

ఫిజికల్‌ ఈవెంట్స్‌లో ఒక సెంటీమీటర్‌, అంతకంటే తక్కువ ఎత్తుతో అనర్హులైన పోలీసు అభ్యర్థులకు రాష్ట్ర ప్రభుత్వం శుభవార్త చెప్పింది. హైకోర్టు సూచనల మేరకు మరోసారి ఆయా అభ్యర్థుల ఎత్తును కొలుస్తామని వెల్లడించింది.

• ఒక సెం.మీ లోపు ఎత్తు తక్కువున్న అభ్యర్థులకు చాన్స్‌
• 10 నుంచి 12 వరకు దరఖాస్తుల స్వీకరణ
• హైకోర్టు సూచనలతో టీఎస్‌ఎల్‌పీఆర్బీ నిర్ణయం

హైదరాబాద్‌, ఫిబ్రవరి 8 (నమస్తే తెలంగాణ) : ఫిజికల్‌ ఈవెంట్స్‌లో ఒక సెంటీమీటర్‌, అంతకంటే తక్కువ ఎత్తుతో అనర్హులైన పోలీసు అభ్యర్థులకు రాష్ట్ర ప్రభుత్వం శుభవార్త చెప్పింది. హైకోర్టు సూచనల మేరకు మరోసారి ఆయా అభ్యర్థుల ఎత్తును కొలుస్తామని వెల్లడించింది. ఈ మేరకు బుధవారం తెలంగాణ స్టేట్‌ పోలీస్‌ రిక్రూట్‌మెంట్‌ బోర్టు (టీఎస్‌ఎల్‌పీఆర్బీ) ఉత్తర్వులు జారీ చేసింది. హైదరాబాద్‌లోని అంబర్‌పేట పోలీసు గ్రౌండ్స్‌, కొండాపూర్‌ 8వ బెటాలియన్‌లో ఎత్తు కొలతల నిర్వహణకు టీఎస్‌ఎల్‌పీఆర్బీ అధికారులు ఏర్పాట్లు చేశారు. ఈవెంట్స్‌కు హాజరయ్యే అభ్యర్థులు ఈ నెల 10 ఉదయం 8 గంటల నుంచి 12వ తేదీ రాత్రి 8 గంటల వరకు www.tslprb.in వెబ్‌సైట్‌లో దరఖాస్తు చేసుకోవాలని కోరారు.

దరఖాస్తుతో పాటు అడ్మిట్‌ కార్డు చూపించి, దేహదారుఢ్య పరీక్షకు హాజరుకావాలని సూచించారు. రాష్ట్రంలో 17,516 ఎస్‌ఐ, కానిస్టేబుల్‌ ఉద్యోగాల కోసం నియామకాల ప్రక్రియ కొనసాగుతున్న విషయం తెలిసిందే. ఇప్పటికే అభ్యర్థులకు ఫిజికల్‌ ఈవెంట్స్‌ ముగిశాయి. మెయిన్స్‌ మాత్రమే నిర్వహించాల్సి ఉన్నది. అయితే, ఫిజికల్‌ ఈవెంట్స్‌లో ఒక సెంటీమీటర్‌, అంతకంటే తక్కువ ఎత్తుతో అర్హత సాధించలేకపోయిన చాలామంది అభ్యర్థులు హైకోర్టును ఆశ్రయించారు. దీంతో ఈ అభ్యర్థులకు మళ్లీ అవకాశం కల్పించాలని హైకోర్టు సూచించింది. దీంతో టీఎస్‌ఎల్‌పీఆర్బీ మరోసారి అభ్యర్థుల ఎత్తు కొలవాలని కీలక నిర్ణయం తీసుకొన్నది.