ఏపీ స్టూడెంట్‌.. టీజీ లోకల్‌!

ఇంటర్‌ బోర్డును పాఠశాల విద్యలో విలీనం చేయాలని రేవంత్‌రెడ్డి ప్రభుత్వం తహతహలాడటం వెనుక బడా కార్పొరేట్‌ మాఫియా ఉన్నదా? అందుకే విలీన పరిణామాలపై సమగ్ర అధ్యయనాలు లేకుండా, నిపుణులతో విస్తృతంగా చర్చించకుండా హడావుడిగా నిర్ణయం తీసుకున్నదా? తెలంగాణ బిడ్డల నోట్లో మట్టి కొట్టి, ఏపీ విద్యార్థులను అందలం ఎక్కించేలా భారీ ప్రణాళిక సిద్ధం చేసిందా? అందుకే వచ్చే విద్యాసంవత్సరం నుంచే అమలు చేయాలని సర్కార్‌ హడావుడి చేస్తున్నదా? ప్రస్తుతం నిపుణులు, విశ్లేషకుల్లో తలెత్తుతున్న అనుమానాలు ఇవి.

• పాఠశాల విద్యలో ‘ఇంటర్‌ విలీనం’ వెనుక పెద్ద కుట్ర
• ఆంధ్రా విద్యార్థులకు పెద్దపీట.. తెలంగాణ విద్యార్థుల వాటా కోత
• బోర్డు రద్దు వెనుక ఆంధ్రా కార్పొరేట్‌ మాఫియా మాయాజాలం
• ఏపీ మెరిట్‌ విద్యార్థులను తెలంగాణకు తరలించే వ్యూహం
• ఇకపై 9-12 తరగతులు నిర్వహించనున్న కాలేజీలు
• ఏటా 40- 50వేల మందికి ఇక్కడి స్థానికత కట్టబెట్టే ఎత్తుగడ
• తెలంగాణ బిడ్డల విద్య, ఉద్యోగావకాశాలకు పక్క రాష్ట్రం ఎసరు

ఇంటర్‌ బోర్డును పాఠశాల విద్యలో విలీనం చేయాలని రేవంత్‌రెడ్డి ప్రభుత్వం తహతహలాడటం వెనుక బడా కార్పొరేట్‌ మాఫియా ఉన్నదా? అందుకే విలీన పరిణామాలపై సమగ్ర అధ్యయనాలు లేకుండా, నిపుణులతో విస్తృతంగా చర్చించకుండా హడావుడిగా నిర్ణయం తీసుకున్నదా? తెలంగాణ బిడ్డల నోట్లో మట్టి కొట్టి, ఏపీ విద్యార్థులను అందలం ఎక్కించేలా భారీ ప్రణాళిక సిద్ధం చేసిందా? అందుకే వచ్చే విద్యాసంవత్సరం నుంచే అమలు చేయాలని సర్కార్‌ హడావుడి చేస్తున్నదా? ప్రస్తుతం నిపుణులు, విశ్లేషకుల్లో తలెత్తుతున్న అనుమానాలు ఇవి.

ఒంటెద్దు పోకడల మాదిరి ప్రభుత్వం వ్యవహరిస్తున్న తీరు ఈ అనుమానాలకు బలం చేకూర్చుతున్నది. ఇంటర్‌ బోర్డు విలీనంతో ఏటా 40-50 వేల మంది ఏపీ విద్యార్థులకు స్థానికత హోదా కట్టబెట్టేందుకు భారీ స్కెచ్‌ వేశారని స్పష్టం చేస్తున్నారు. తద్వారా తెలంగాణ బిడ్డల విద్య, ఉద్యోగ అవకాశాలకు గండిపడుతదని ఆందోళన వ్యక్తం చేస్తున్నారు.

(కొంటు మల్లేశం)
హైదరాబాద్‌, నవంబర్‌ 14 (నమస్తే తెలంగాణ): తెలంగాణ విద్యార్థుల వాటాకు కన్నం! ఏపీ విద్యార్థుల ‘స్థానికత’ పట్టం!.. రాష్ట్రంలో ఇంటర్‌బోర్డు రద్దు, పాఠశాల విద్యలో విలీనం వెనుకున్న అసలు మతలబు ఇదేనన్న ఆరోపణలు వినిపిస్తున్నాయి. వేలాది మంది ఏపీ విద్యార్థులను తెలంగాణకు తరలించి, వారికి ‘స్థానికత’ కట్టబెట్టేందుకే ఈ విధానాన్ని తెరపైకి తెచ్చారని విశ్లేషకులు పేర్కొంటున్నారు. దీని వెనుక కార్పొరేట్‌ కాలేజీల మంత్రాంగం ఉన్నదని అనుమానిస్తున్నారు. 9-12 తరగతులు నిర్వహించడం ద్వారా తమ కాలేజీల్లో చదివే వారందరికీ స్థానికత కల్పించేలా ఎత్తుగడ వేశాయని చెప్తున్నారు. తద్వారా ఏపీకి చెందిన మెరిట్‌ విద్యార్థులను తెలంగాణకు రప్పించి, ర్యాంకులు సాధించి, ప్రచారం చేసుకొని ఫీజులు దండుకునేలా ప్లాన్‌ వేశాయని విశ్లేషిస్తున్నారు. కార్పొరేట్‌ కాలేజీల స్వార్థ ప్రయోజనానికి సర్కార్‌ తలొగ్గిందని అనుమానిస్తున్నారు. తద్వారా తెలంగాణ బిడ్డల విద్య, ఉద్యోగ అవకాశాలకు గండికొట్టి, ఏటా వేలాది మంది నోట్లో మట్టికొట్టేందుకు సిద్ధమైందని మండిపడుతున్నారు.

చివరి నాలుగేండ్లే ‘స్థానికత’
ఉద్యోగాలతో పోల్చితే ఉన్నత విద్యలో ప్రవేశాలకు స్థానిక కోటా నిబంధనలు భిన్నంగా ఉన్నాయి. ప్రవేశం పొందగోరే కోర్సుకు ముందు చివరి నాలుగేండ్లు ఎక్కడ చదివితే అక్కడే లోకల్‌గా పరిగణిస్తారు. అంటే ఇంజినీరింగ్‌, మెడిసిన్‌, ఫార్మసీ, డిగ్రీల్లో చేరాలనుకునేవారికి చివరి నాలుగేండ్లు అంటే 9వ తరగతి నుంచి ఇంటర్‌ వరకు అవుతున్నది. కాబట్టి ఆ నాలుగేండ్లు తెలంగాణలో చదివితేనే స్థానిక కోటాకు అర్హులు. ఆంధ్రప్రదేశ్‌లోనూ ఇలాంటి నిబంధనే అమల్లో ఉన్నది.

ఇంటర్‌తో రాని స్థానిక హోదా
ఆంధ్రప్రదేశ్‌తో పోల్చితే తెలంగాణలోనే విద్యావసతులు అద్భుతంగా ఉన్నాయి. జాతీయ స్థాయి కోచింగ్‌ సౌకర్యాలు ఉన్నాయి. ఈ నేపథ్యంలో ఏపీకి చెందిన విద్యార్థుల్లో ఏటా వేలాది మంది తెలంగాణలో ఇంటర్‌ చదువుతున్నారు. పదోతరగతి వరకు ఏపీలో చదివి ఇంటర్‌ విద్య కోసం హైదరాబాద్‌కు వస్తున్నారు. ప్రత్యేకించి కార్పొరేట్‌ కాలేజీలు అక్కడి మెరిట్‌ విద్యార్థులను జల్లెడ పట్టి హైదరాబాద్‌కు తీసుకొస్తున్నాయి. తమ కాలేజీల్లో ఇంటర్‌ అడ్మిషన్లు ఇచ్చి, ఐఐటీ, నీట్‌ అకాడమీల్లో చేర్పించి శిక్షణ ఇస్తున్నాయి.

అయితే ఇలాంటి విద్యార్థుల స్థానికత విషయంలో ఇబ్బందులు తలెత్తుతున్నాయి. పదోతరగతి వరకు ఏపీలో 11, 12వ తరగతులను తెలంగాణలో చదవడంతో వారు తెలంగాణలో ‘స్థానికత’ హోదా పొందలేకపోతున్నారు. దీంతో వారికి టాప్‌ ఇంజినీరింగ్‌, మెడిసిన్‌ కాలేజీల్లో సీట్లు రావడం లేదు. ఏపీలోనూ ఇలాంటి నిబంధనలే ఉండటంతో చాలా మంది మెరిట్‌ విద్యార్థులు కార్పొరేట్‌ కాలేజీలకు రావడానికి సంశయిస్తున్నారు. ఈ నేపథ్యంలో కార్పొరేట్‌ కాలేజీలు మెరిట్‌ విద్యార్థులకు గాలం వేయడానికి, తమ అడ్మిషన్లను, ర్యాంకర్ల సంఖ్యను పెంచుకోవడానికి పక్కా ప్లాన్‌ వేసినట్టు అనుమానిస్తున్నారు.

కార్పొరేట్‌ శక్తుల డైరెక్షన్‌లో..
కార్పొరేట్‌ శక్తుల డైరెక్షన్‌లో, వారి ప్రయోజనాలకు అనుగుణంగానే ప్రభుత్వం నూతన విద్యావిధానాన్ని ప్రతిపాదించిందని చెప్తున్నారు. ఇందుకు ప్రభుత్వం తీరే నిదర్శనమని అంటున్నారు. నేషనల్‌ ఎడ్యుకేషన్‌ పాలసీ (ఎన్‌ఈపీ)కి అనుగుణంగా మార్పులు చేస్తున్నట్టు ప్రభుత్వం పైకి చెప్తున్నది. కానీ ఎన్‌ఈపీ 5+3+3+4 విధానాన్ని సూచిస్తున్నది. కానీ రాష్ట్ర ప్రభుత్వం దీనికి భిన్నంగా 7+4+4 విద్యావిధానాన్ని ప్రకటించింది. ఇది కార్పొరేట్‌ శక్తులకు అత్యంత అనుకూల నిర్ణయమని విద్యారంగ నిపుణులు స్పష్టం చేస్తున్నారు. కార్పొరేట్‌ విద్యాసంస్థలు విద్యార్థులకు ఇంటర్‌లో కాకుండా, ముందు నుంచే ఐఐటీ, నీట్‌ ఫౌండేషన్‌ శిక్షణ ఇవ్వాలని భావిస్తున్నాయి.

ఇందుకోసం 8వ తరగతి నుంచే విద్యార్థులను చేర్చుకోవాలని ప్రయత్నిస్తున్నాయి. తద్వారా తమ కాలేజీల్లో ర్యాంకర్ల సంఖ్య పెరుగుతుందని అనుకుంటున్నాయి. కానీ విద్యాశాఖ నేరుగా 8, 9, 10వ తరగతులకు అనుమతులు ఇవ్వడం లేదు. ఒకటోతరగతి నుంచి 10వ తరగతి వరకు పాఠశాలలకు మాత్రమే అనుమతులు ఇస్తున్నది. ఇది కార్పొరేట్‌ కాలేజీలకు మింగుడు పడటం లేదు. ఇంటర్‌బోర్డు రద్దు చేసిన తర్వాత ఇకపై 7+4+4 విద్యావిధానం అమల్లోకి వస్తుంది. దీంతో ఇక నుంచి కాలేజీలకు 9,10వ తరగతులు నిర్వహించుకునేందుకు కూడా అనుమతి ఇవ్వనున్నారు. తద్వారా కార్పొరేట్‌ కాలేజీలకు ఇన్నాళ్లూ ఉన్న అడ్డంకి తొలిగినట్టు అవుతుంది. తమకు కావాల్సిన విద్యార్థులను 9వ తరగతిలోనే చేర్చుకునేందుకు అవకాశం కలుగుతుంది.

ఏటా 50వేల మంది అనర్హులకు ‘లోకల్‌’ హోదా
ఇంటర్‌ బోర్డు రద్దుతో తెలంగాణ విద్యార్థులకు తీవ్ర అన్యాయం జరుగనున్నదని నిపుణులు ఆందోళన వ్యక్తంచేస్తున్నారు. ఇకపై కార్పొరేట్‌ కాలేజీలు ఏపీ, ఇతర రాష్ర్టాల విద్యాసంస్థల నుంచి మెరిట్‌ స్టూడెంట్లను తీసుకొచ్చి, 9వ తరగతిలో ప్రవేశం కల్పిస్తాయని అంటున్నారు. 9 నుంచి 12వ తరగతి వరకు వరుసగా నాలుగేండ్లు ఇక్కడే చదివితే వారంతా లోకల్‌ అయిపోతారని విశ్లేషిస్తున్నారు. వాస్తవానికి విద్యావసతులు మెరుగ్గా ఉండటంతో ఇతర రాష్ర్టాల నుంచి ఏటా తెలంగాణకు ‘విద్యా వలసలు’ పెరుగుతున్నాయి.

ప్రత్యేకించి ఇంటర్‌ చదువుల కోసం వచ్చే వారి సంఖ్య ఏటా పెరుగుతున్నది. గత నాలుగేండ్ల కాలంలో ఇది అధికమైందని అధికారిక లెక్కలు ధ్రువీకరిస్తున్నాయి. 2023-24లో 48వేల మంది తెలంగాణలో ఇంటర్‌ చదివేందుకు వలస రాగా, 2026-27 సంవత్సరానికి వచ్చే సరికి ఈ సంఖ్య 56 వేలకు చేరింది. అంటే 8 వేల మంది పెరిగారు. వీరిలో అత్యధికులు ఏపీ నుంచి వచ్చిన వారే. భవిష్యత్తులో వీరు 9వ తరగతి నుంచి ఇంటర్‌ వరకు ఇక్కడే చదివితే అందరూ స్థానికులైపోతారని నిపుణులు చెప్తున్నారు.

విద్య, ఉద్యోగాల్లో అన్యాయం
కొత్త విధానంలో విద్యతోపాటు, ఉద్యోగాల్లోనూ తెలంగాణ బిడ్డలకు అన్యాయం జరుగుతుందని ఆందోళన వ్యక్తం చేస్తున్నారు. కార్పొరేట్‌ కాలేజీలు మెరిట్‌ విద్యార్థులను జల్లెడ పట్టి ఎంపిక చేయడంతో ఆయా విద్యార్థులకే మంచి ర్యాంకులొస్తాయి. ఎప్‌సెట్‌ ద్వారా టాప్‌ 20 కాలేజీల్లోని సీట్లను వారే ఎగరేసుకుపోతారు. తద్వారా తెలంగాణ బిడ్డల అవకాశాలు కోల్పోనున్నారు. హైదరాబాద్‌ ఐటీ రాజధానిగా విరాజిల్లుతున్న సంగతి తెలిసిందే. హైదరాబాద్‌లోని మల్టీనేషనల్‌ ఐటీ కంపెనీలు ప్రధానంగా హైదరాబాద్‌ చుట్టుపక్కల ఉన్న కాలేజీల్లోనే క్యాంపస్‌ డ్రైవ్‌లను నిర్వహించి ఎంపిక చేసుకుంటాయి. ఆయా కాలేజీల్లో స్థానిక కోటా కింద ఏపీ విద్యార్థులే తిష్ట వేస్తారు కాబట్టి.. వారే ఎంపికవుతారు. తద్వారా తెలంగాణ బిడ్డలకు ఉద్యోగాల్లోనూ తీవ్ర నష్టం కలుగుతుందని ఆందోళన వ్యక్తం చేస్తున్నారు.

ఫీజుల భారం మన ఖజానాపైనే..
విద్య, ఉద్యోగాలకే కాదు.. ఫీజు రీయింబర్స్‌మెంట్‌ రూపంలో తెలంగాణ ఖజానాపై భారం పడనున్నది. ఎప్‌సెట్‌లో 10వేలలోపు ర్యాంకు వచ్చిన వారి పూర్తి ఫీజులను ప్రభుత్వమే చెల్లిస్తున్న సంగతి తెలిసిందే. భవిష్యత్తులో ఏపీ విద్యార్థులు స్థానికత అర్హత పొందితే.. నిబంధనల ప్రకారం వారు కూడా రీయింబర్స్‌మెంట్‌కు అర్హులు అవుతారు. అంటే ఏపీ విద్యార్థుల ఫీజులను కూడా తెలంగాణ ప్రభుత్వమే భరించాల్సి వస్తుందన్నమాట. మొత్తంగా నూతన విద్యావిధానం పాలన సంస్కరణగా ప్రభుత్వం చెప్పుకుంటున్నా, దాని పర్యవసానాలు భిన్నంగా ఉన్నాయన్నది వాస్తవం. కాబట్టి ప్రభుత్వం వెంటనే తన నిర్ణయాన్ని సమీక్షించాలని డిమాండ్‌ చేస్తున్నారు.

‘స్థానిక’ కోటాలోనూ అన్యాయం
రాష్ట్రంలోని వృత్తి విద్యాకోర్సుల్లో 2025 విద్యాసంవత్సరం వరకు 15శాతం ఓపెన్‌ కోటా అమలైంది. ఇంజినీరింగ్‌ సహా పలు వృత్తి విద్యాకోర్సుల్లో ఈ 15 శాతం కోటాను అమలు చేశారు. ఇందులో అత్యధిక శాతం సీట్లు ఏపీ వారికే దక్కాయి. ఇలా వేలాది మంది ఏపీ విద్యార్థులు లబ్ధిపొందారు. టాప్‌ కాలేజీల్లో సీట్లను వారే కైవసం చేసుకునేవారు. అయితే రాష్ట్ర విభజన జరిగి పదేండ్ల గడువు ముగియడంతో ఈ కోటా రద్దయ్యింది. ప్రస్తుతం మొత్తం సీట్లు తెలంగాణ వారికే దక్కుతున్నాయి. దీంతో ఏపీ మెరిట్‌ విద్యార్థులు కార్పొరేట్‌ కాలేజీల్లో చేరేందుకు ఒకటికి రెండుసార్లు ఆలోచిస్తున్నారు. దీంతో ‘కోటా’తో మూసుకుపోయిన దారులను ‘స్థానికత’ ద్వారా తిరిగి పొందేందుకు ప్రయత్నం చేస్తున్నారని విశ్లేషిస్తున్నారు. ఈ నేపథ్యంలోనే స్వార్థ శక్తుల డైరెక్షన్‌లో రేవంత్‌రెడ్డి సర్కార్‌ దొడ్దిదారిన ఇంటర్‌ బోర్డు తంతుకు తెరలేపిందని ఆరోపిస్తున్నారు.

తెలంగాణకు వలసలు ఇలా..
సంవత్సరం : వలస వచ్చినవారు
2023-24 : 48,246
2024-25 : 52,261
2025-26 : 54,265
2026-27 : 56,367

తెలంగాణ ప్రయోజనాలకు గొడ్డలిపెట్టు
ఇంటర్‌ బోర్డు రద్దు, టెన్‌ ప్లస్‌ టూ విద్యా విధానంతో తెలంగాణ ప్రయోజనాలకు గండి పడే ప్రమాదం పొంచి ఉన్నది. ఇంజినీరింగ్‌, మెడికల్‌ సీట్లల్లో భారీ నష్టం వాటిల్లుతుంది. ఇప్పటిదాక ఇంటర్‌ మాత్రమే ఉన్న కార్పొరేట్‌ కాలేజీలు ఇకపై 9, 10వ తరగతులను ప్రారంభిస్తాయి. స్థానికేతర విద్యార్థులను చేర్చుకుంటాయి. నాలుగేండ్లు తెలంగాణలోనే చదవడంతో వారంతా స్థానికులైపోతారు. మన సీట్లు, అవకాశాలు ఎగరేసుకుపోతారు. కనుక విలీన నిర్ణయాన్ని తక్షణమే ఉపసంహరించుకోవాలి. తెలంగాణ వాదులు, ఉద్యమకారులు ఈ నిర్ణయాన్ని తీవ్రంగా వ్యతిరేకించాలి.
– డాక్టర్‌ పీ మధుసూదన్‌రెడ్డి, ఇంటర్‌ విద్య జేఏసీ చైర్మన్‌

విలీనం వెనుక భారీ కుట్ర
ఇంటర్‌బోర్డు విలీనం వెనుక భారీ కుట్ర దాగి ఉన్నది. ఏదో ఎజెండాతోనే బోర్డును విలీనం చేసినట్లు అనిపిస్తున్నది. అనేక అనుమానాలున్నా.. అభ్యంతరాలు వ్యక్తమవుతున్నా ప్రభుత్వం స్పష్టత ఇవ్వడంలేదు. విలీనంతో విద్యారంగం చక్కబడుతుందని సీఎం అనుకుంటే అవివేకమే అవుతుంది. పాలిటెక్నిక్‌ విద్య విషయంలో తొందరపాటును ప్రదర్శించి చేతులు కాల్చుకున్నది. ఇంటర్‌ విషయంలో ఇదే జరగనున్నది.
– బీ భుజంగరావు, ఎస్టీయూ టీఎస్‌ రాష్ట్ర మాజీ అధ్యక్షుడు

విలీనాన్ని విరమించుకోవాల్సిందే
ఇంటర్‌ బోర్డును రద్దుచేసి.. పాఠశాల విద్యలో విలీనం చేయడం చారిత్రక తప్పిదం. ఇలాంటి ఆకస్మిక నిర్ణయాలు విద్యారంగంలో సత్ఫలితాలివ్వవు. విలీనంతో తెలంగాణ విద్యార్థులకు నష్టం కలుగుతుందన్న ఆందోళనలు ఉన్నాయి. ఉపాధ్యాయులు, అధ్యాపకులతో చర్చించకుండా మేధోమథనం నిర్వహించకుండా ప్రభుత్వం ఏకపక్షంగా నిర్ణయం తీసుకోవడం శోచనీయం. ప్రభుత్వం విలీనాన్ని విరమించుకోవాలని డిమాండ్‌ చేస్తున్నాం.
– మట్టపల్లి రాధాకృష్ణ, తెలంగాణ ప్రోగ్రెసివ్‌ టీచర్స్‌ యూనియన్‌ రాష్ట్ర అధ్యక్షుడు

ఇంటర్‌ విలీనంపై ఉద్యోగులకు భరోసా కల్పించాలి: లచ్చిరెడ్డి
ఇంటర్‌బోర్డు విలీనం నేపథ్యంలో ఉద్యోగులకు భరోసా కల్పించాలని తెలంగాణ ఎంప్లాయిస్‌ జేఏసీ చైర్మన్‌ వీ లచ్చిరెడ్డి డిమాండ్‌ చేశారు. ఈ మేరకు శనివారం సచివాలయంలో విద్యాశాఖ కార్యదర్శి డాక్టర్‌ యోగితారాణాను కలిసి వినతిపత్రాన్ని సమర్పించారు. కాంట్రాక్ట్‌ విధానంలో పనిచేసి రెగ్యులరైజ్‌ అయిన జూనియర్‌ లెక్చరర్ల ప్రొబేషన్‌ డిక్లరేషన్‌ పూర్తిచేయాలని.. జాయింట్‌ సెక్రటరీ పోస్టులను పెంచాలని కోరారు. వినతిపత్రం సమర్పించిన వారిలో జేఏసీ నాయకులు బాణాల రాంరెడ్డి, వీ భిక్షం, యారా కుమారస్వామి, జగదీశ్వర్‌రెడ్డి, సుబ్రహ్మణ్యం తదితరులు ఉన్నారు.