Shadow Minister | మైనారిటీ శాఖలో షాడో మినిస్టర్ హల్చల్.. మంత్రి అజారుద్దీన్‌కు తెలియకుండానే సమీక్షలు

Shadow Minister | రాష్ట్ర మైనారిటీ శాఖలో షాడో మినిస్టర్ హల్చల్ చేస్తున్నారనే ప్రచారం రాజకీయ, అధికార వర్గాల్లో చర్చనీయాంశంగా మారింది. నామినేటెడ్ పోస్టులో ఉన్న ఓ నాయకుడు మైనారిటీ శాఖను తన గుప్పిట్లో పెట్టుకుని పెత్తనం చలాయిస్తున్నాడని జోరుగా ప్రచారం జరుగుతోంది.

Shadow Minister | రాష్ట్ర మైనారిటీ శాఖలో షాడో మినిస్టర్ హల్చల్ చేస్తున్నారనే ప్రచారం రాజకీయ, అధికార వర్గాల్లో చర్చనీయాంశంగా మారింది. నామినేటెడ్ పోస్టులో ఉన్న ఓ నాయకుడు మైనారిటీ శాఖను తన గుప్పిట్లో పెట్టుకుని పెత్తనం చలాయిస్తున్నాడని జోరుగా ప్రచారం జరుగుతోంది. మంత్రి అజారుద్దీన్‌కు తెలియకుండానే సమీక్షా సమావేశాలు సైతం నిర్వహిస్తున్నాడనే ఆరోపణలు వినిపిస్తున్నాయి.

జిల్లా స్థాయి నుంచి సెక్రటేరియట్ స్థాయి వరకు మైనారిటీ శాఖకు సంబంధించిన ఏ పనైనా తన అనుమతి లేకుండా జరగకూడదని అధికారులకు సదరు లీడర్ హుకుం జారీ చేసినట్లుగా ఆరోపణలు ఉన్నాయి. అధికారులు లేదా స్థానిక నేతలు ఆయన్ను పక్కనబెట్టి నేరుగా ఉన్నత స్థాయి అధికారులను సంప్రదిస్తే.. స్వయంగా ఫోన్ చేసి క్లాస్ పీకుతాడని.. బదిలీ చేస్తానని బెదిరిస్తాడని కొందరు అధికారులు చెబుతున్నారు. దీంతో ఆయనతో వైరం పెట్టుకునే బదులు చేయి కలపడమే మేలు అనుకుని అతని ఇంటికి వెళ్లి మరీ పలువురు లీడర్లు, అధికారులు కలుస్తున్నారని చర్చ నడుస్తోంది.

ఇటీవల ఉత్తర తెలంగాణలోని ఓ ఉమ్మడి జిల్లాకు సంబంధించిన మైనారిటీ శాఖ సమీక్ష వీడియో కాన్ఫరెన్స్ ద్వారా నిర్వహించగా.. మైనారిటీ శాఖ మంత్రి లేకుండానే సదరు షాడో మినిస్టర్‌నే సమీక్ష చేపట్టడం మరింత చర్చకు దారి తీసింది. దీంతో అజారుద్దీన్‌కు కేవలం పేరుకే మంత్రి పదవి ఇచ్చారా? ఆయన డమ్మీ మంత్రేనా అని రాజకీయ వర్గాల్లో చర్చ నడుస్తోంది.