గట్టిగా.. అల్కగ..

• ధృడమైన బీటా టైటానియం మిశ్రమం తయారీ
• హైదరాబాద్‌లోని డీఎంఆర్‌ఎల్‌ ఘనత

హైదరాబాద్‌, జూలై 20 (నమస్తే తెలంగాణ): తక్కువ బరువు ఉండి, ఎక్కువ గట్టిదనం ఉన్న మెటాస్టేబుల్‌ బీటా టైటానియం మిశ్రమాన్ని హైదరాబాద్‌లోని డీఆర్‌డీవోకు చెందిన డిఫెన్స్‌ మెటలర్జికల్‌ రిసెర్చ్‌ ల్యాబొరేటరీ (డీఎంఆర్‌ఎల్‌) అభివృద్ధి చేసింది. ఈ లోహ మిశ్రమం(Ti-10V-2Fe-3Al)తో విమానయాన రంగానికి చెందిన వస్తువులను తయారుచేయవచ్చు. ల్యాండింగ్‌ గేర్‌, డ్రాప్‌ ఇన్‌ ల్యాండింగ్‌ గేర్‌ వంటి విమాన విడిభాగాలను ఈ మిశ్రమాన్ని ఉపయోగించి తక్కువ బరువుతో రూపొందించవచ్చని డీఆర్‌డీవో అధికారులు తెలిపారు. థర్మో మెకానికల్‌ ప్రాసెసింగ్‌, అల్ట్రాసోనిక్‌ నాన్‌ డిస్ట్రక్టివ్‌ ఎవాల్యుయేషన్‌, హీట్‌ ట్రీట్మెంట్‌ వంటి అనేక పరీక్షలు నిర్వహించి దాని ధృడత్వాన్ని పరిశీలించినట్టు వెల్లడించారు. విమాన తయారీకి వాడే 15 రకాల స్టీల్‌ పదార్థాలను ఈ లోహ మిశ్రమంతో భర్తీ చేసుకొనే వీలుందని ఏరోనాటికల్‌ డెవలప్‌మెంట్‌ ఏజెన్సీ కూడా ధ్రువీకరించింది. దాంతో 40 శాతం వరకు బరువు తగ్గుతుందని వెల్లడించింది.