బేగంపేట్ జూన్ 1: అత్యంత భారీ పరిమాణంలో ఫైబ్రాయిడ్ ఉన్న ఓ మహిళ (45)కు కిమ్స్ దవాఖాన వైద్యులు రోబోటిక్ సర్జరీతో ఊరట కల్పించారు. హైదరాబాద్కు చెందిన ఆ మహిళ.. కొద్దిగా తిన్నా కడుపు నిండిపోయినట్టుగా అనిపించడం, మూత్ర విసర్జన నెమ్మదించడం లాంటి సమస్యలతో 3 నెలల నుంచి బాధపడుతున్నది. ఆమె కడుపులో 21X10X18 సెం.మీ. పరిమాణంలో భారీ ఫైబ్రాయిడ్ ఉన్నట్టు కిమ్స్ వైద్యులు గుర్తించారు.
గర్భాశయ ముఖద్వారం వైపు నుంచి ఉదరంలో పైభాగం వైపు విస్తరించిన ఈ ఫైబ్రాయిడ్ వల్ల గర్భాశయంలో, మూత్రపిండాల్లో వాపు ఏర్పడినట్టు తేల్చారు. సాధారణంగా పెద్ద సైజులో ఉండే ఫైబ్రాయిడ్లను తొలగించేందుకు ఓపెన్ సర్జరీ పద్ధతిని అనుసరిస్తారు. కానీ, కిమ్స్లో రోబోటిక్ టెక్నాలజీ అందుబాటులో ఉన్నందున కుటుంబసభ్యుల అంగీకారంతో బాధిత మహిళకు మే 17న విజయవంతంగా రోబోటిక్ సర్జరీ నిర్వహించారు.
కడుపు కింది భాగంలో చిన్న కోత పెట్టి ఫైబ్రాయిడ్తోపాటు గర్భాశయాన్ని తొలగించారు. ఆ తర్వాత ఎలాంటి ఆరోగ్య సమస్యలు రాకపోవడంతో మే 20న ఆమెను డిశ్చార్జి చేసినట్టు లాప్రోస్కోపిక్ సర్జన్ డాక్టర్ బిందుప్రియ గురువారం వెల్లడించారు. ఈ సర్జరీని రోబో అసిస్టెడ్ మయోమెక్టమీ విత్ హిస్టరెక్టమీ అంటారని వైద్యులు తెలిపారు.