హైదరాబాద్ : తెలంగాణ బీసీ, ఎస్సీ, ఎస్టీ సంక్షేమ గురుకుల డిగ్రీ కళాశాలల్లో ప్రవేశాల కోసం నిర్వహించే పరీక్షకు దరఖాస్తు చేసుకునేందుకు ఏప్రిల్ 15 ఆఖరు తేదీ. 2024-25 విద్యా సంవత్సరానికిగాను డిగ్రీ మొదటి సంవత్సరంలో ప్రవేశాల కోసం ఇంటర్ పూర్తిచేసిన విద్యార్థులు ఈ పరీక్ష రాస్తారు. గురుకుల డిగ్రీ కాలేజీల్లో రెగ్యులర్ కోర్సులతోపాటు ఒకేషనల్ కోర్సులు కూడా అందుబాటులో ఉన్నాయి. అర్హత సాధించిన విద్యార్థులకు పూర్తి ఉచితంగా విద్యా, భోజన వసతితోపాటు యూనిఫామ్, నోట్ బుక్స్, టెక్స్ట్ బుక్స్ మొదలైనవి ఉచితంగా ఇస్తారు.
TGRDC CET 2024 పరీక్ష ద్వారా ఈ కోర్సులలో ప్రవేశాలు కల్పిస్తారు. అందుకు tsrdccet.cgg.gov.in ద్వారా దరఖాస్తు చేసుకోవాలి. రేపటితో దరఖాస్తుల ప్రక్రియ పూర్తికానుంది. ఇక ప్రవేశ పరీక్ష ఏప్రిల్ 28న జరుగుతుంది. అదేవిధంగా రాష్ట్రవ్యాప్తంగా ఉన్న 261 జూనియర్ కాలేజీల్లో రెగ్యులర్ కోర్సులతో పాటుగా ఒకేషనల్ కోర్సులు అందుబాటులో ఉన్నాయి. TGRJC CET – 2024 ద్వారా ఆయా కోర్సుల్లో ప్రవేశాలు కల్పిస్తారు. పదో తరగతి పరీక్షలు రాసిన విద్యార్థులు ఈ పరీక్షకు దరఖాస్తు చేసుకోవచ్చు. ఈ పరీక్ష కూడా ఏప్రిల్ 28న జరుగుతుంది. పరీక్షకు వారం వారం రోజులు ముందుగా హాల్ టికెట్లు డౌన్లోడ్ చేసుకోవచ్చు.