మౌనంగా తిరిగొస్తరా?

మరోసారి ఢిల్లీకి వెళ్తున్న సీఎం రేవంత్‌రెడ్డి, నీటి పారుదల శాఖ మంత్రి ఉత్తమ్‌ కుమార్‌రెడ్డి తెలంగాణ నీటి ప్రయోజనాలపై ప్రధాని మోదీని నిలదీస్తారా? లేక తలవంచి మౌనంగా తిరిగి వస్తారా? అని బీఆర్‌ఎస్‌ఎల్పీ డిప్యూటీ ఫ్లోర్‌లీడర్‌ హరీశ్‌రావు ప్రశ్నించారు.

• మోదీని నిలదీస్తరా?

• సమ్మక సారలమ్మ డీపీఆర్‌ను వెనకి పంపడం అన్యాయం: హరీశ్‌రావు

• 968 టీఎంసీల హకుపై ప్రధాని నుంచి హామీ తేవాలి

• ఇచ్చంపల్లి కాదని పోలవరం నుంచి ప్రాజెక్ట్‌ చేపడితే సహించం

• తెలంగాణ నీటి హకుల కోసం బీఆర్‌ఎస్‌ మరో ప్రజా ఉద్యమం

• రేవంత్‌, ఉత్తమ్‌ ఢిల్లీ పర్యటన నేపథ్యంలో హరీశ్‌రావు ధ్వజం

హైదరాబాద్‌, నవంబర్‌ 14 (నమస్తే తెలంగాణ): మరోసారి ఢిల్లీకి వెళ్తున్న సీఎం రేవంత్‌రెడ్డి, నీటి పారుదల శాఖ మంత్రి ఉత్తమ్‌ కుమార్‌రెడ్డి తెలంగాణ నీటి ప్రయోజనాలపై ప్రధాని మోదీని నిలదీస్తారా? లేక తలవంచి మౌనంగా తిరిగి వస్తారా? అని బీఆర్‌ఎస్‌ఎల్పీ డిప్యూటీ ఫ్లోర్‌లీడర్‌ హరీశ్‌రావు ప్రశ్నించారు. నీళ్ల విషయంలో కాంగ్రెస్‌ సర్కార్‌ నిర్లక్ష్యం, కేంద్ర ప్రభుత్వ వివక్ష వల్ల రాష్ర్టానికి తీరని అన్యాయం జరుగుతున్నదని ఆరోపించారు. రాష్ర్టానికి చట్టబద్ధంగా దకాల్సిన 968 టీఎంసీల గోదావరి జలాల వినియోగానికి సంబంధించిన అన్ని ప్రాజెక్టులకు కేంద్రం నుంచి అనుమతులు సాధిస్తామని ప్రధాని వద్ద స్పష్టమైన హామీ తీసుకోవాలని ఆయన శనివారం ఒక ప్రకటనలో డిమాండ్‌ చేశారు. 47 టీఎంసీల జలాల హైడ్రాలజీ క్లియరెన్స్‌ ఇప్పటికే పూర్తయిన సమ్మక-సారలమ్మ ప్రాజెక్ట్‌ డీపీఆర్‌ను సీడబ్ల్యూ కొత్త మార్గదర్శకాల పేరుతో వెనకి పంపడం దారుణమని విమర్శించారు. ప్రాజెక్టుకు టీఏసీ అనుమతి మాత్రమే రావాల్సి ఉన్నదని, అలాంటి ప్రాజెక్టును ముందుకు తీసుకెళ్లలేని అసమర్థత ఈ ప్రభుత్వానిదేనని మండిపడ్డారు. కేంద్రం వద్ద తెలంగాణ వాదనను బలంగా వినిపించే చిత్తశుద్ధి రేవంత్‌ ప్రభుత్వానికి లేకపోవడం సిగ్గుచేటని ఆగ్రహం వ్యక్తంచేశారు. మరోవైపు ఏపీ సీఎం చంద్రబాబు ఆరు నెలలుగా పోలవరం-బనకచర్ల ప్రాజెక్టు గురించి ప్రతి వేదికపై మాట్లాడుతున్నారని, తాజాగా సీఐఐ సదస్సులోనూ గోదావరి-కావేరి అనుసంధానాన్ని పోలవరం నుంచి బనకచర్ల వరకు చేపడుతామని ప్రకటించారని గుర్తుచేశారు.

నాడు బీఆర్‌ఎస్‌ స్పష్టమైన వైఖరి

తెలంగాణ ప్రయోజనాల విషయంలో బీఆర్‌ఎస్‌ ప్రభుత్వం రాజీపడకుండా స్పష్టమైన వైఖరి తీసుకున్నదని హరీశ్‌రావు గుర్తుచేశారు. 968 టీఎంసీల గోదావరి జలాలపై రాష్ట్ర ప్రాజెక్టులన్నింటికీ ముందుగా కేంద్రం అనుమతులు ఇవ్వాలని, ఆ తర్వాతే నదుల అనుసంధాన ప్రాజెక్టును చేపట్టాలని డిమాండ్‌ చేసిందని హరీశ్‌రావు గుర్తుచేశారు. తరలించే 148 టీఎంసీల్లో తెలంగాణకు 50 శాతం అంటే 75 టీఎంసీలు కేటాయించాలని బీఆర్‌ఎస్‌ ప్రభుత్వం పట్టుబట్టిందని తెలిపారు. ఇచ్చంపల్లి నుంచే ఈ ప్రాజెక్టును చేపట్టాలని, తెలంగాణ భూభాగం మీదుగా అలైన్‌మెంట్‌ ఉండాలని స్పష్టం చేసిందని, తెలంగాణ డిమాండ్లను సానుకూలంగా పరిశీలిస్తామని కేంద్ర టాస్‌ఫోర్స్‌ సైతం నాడు హామీ ఇచ్చిందని పేర్కొన్నారు.

ప్రభుత్వ అభ్యర్థన మేరకే ఎన్‌డబ్ల్యూడీఏ ఇచ్చంపల్లి నుంచి గ్రాండ్‌ అనికట్‌ వరకు డీపీఆర్‌ రూపొందించి సంబంధిత రాష్ట్రాలకు పంపిణీ చేసిందని తెలిపారు. కేవలం చంద్రబాబు ఒత్తిడికి తలొగ్గి ఆర్థికంగా వయబుల్‌ కాని ఏపీ మినహా ఇతర రాష్ట్రాలకు ప్రయోజనం లేని ప్రాజెక్టును తెరపైకి తెచ్చారని, పోలవరం నుంచి బనకచర్లకు ప్రాజెక్టు అలైన్‌మెంట్‌ను మార్చారని ఆక్షేపించారు. జాతీయ ప్రాజెక్టును పకనపెట్టి ఏపీకి అనుకూలంగా మార్చే కుట్రను సహించబోమని, మన నీటి హకుల కోసం బీఆర్‌ఎస్‌ మరో ప్రజా ఉద్యమం చేపడుతుందని హరీశ్‌రావు హెచ్చరించారు.

ఢిల్లీ పర్యటన నేపథ్యంలో బీఆర్‌ఎస్‌ డిమాండ్లు:

• .తత968 టీఎంసీల గోదావరి జలాల వినియోగంపై అన్ని ప్రాజెక్టుకు తక్షణమే కేంద్ర అనుమతులు సాధించాలి.
• .పాత మార్గదర్శకాల ప్రకారమే సమ్మక-సారక ప్రాజెక్టు డీపీఆర్‌ను ఆమోదించి, వెంటనే టీఏసీ అనుమతి ఇప్పించాలి.
• గోదావరి-కావేరి అనుసంధాన ప్రాజెక్టును ఇచ్చంపల్లి నుంచే చేపట్టాలి.
• .ఈ ప్రాజెక్టులో తెలంగాణకు 148 టీఎంసీల్లో 75 టీఎంసీల వాటా కేటాయించాలి.
• ప్రయోజనాలకు విఘాతం కలిగించే పోలవరం-బనకచర్ల అలైన్‌మెంట్‌ను తీవ్రంగా వ్యతిరేకించాలి.

పథకాలకు పేర్లు పెడితే సరిపోదు..

• ఇచ్చిన హామీలను అమలుచేసినప్పుడేఇందిరమ్మ, రాజీవ్‌లకు నిజమైన గౌరవం
• రేవంత్‌రెడ్డి ప్రభుత్వం మూడు బడ్జెట్ల వైఫల్యాలపై సమీక్ష జరిపి లెక్కలు అడుగండి
• రాహుల్‌గాంధీకి హరీశ్‌రావు సూటి ప్రశ్నలు

హైదరాబాద్‌, నవంబర్‌ 14 (నమస్తే తెలంగాణ): ఎన్నికల సమయంలో ఇచ్చిన హామీలను అమలుచేయకుండా కాంగ్రెస్‌ ప్రభుత్వం ప్రజలను మోసం చేస్తున్నదని బీఆర్‌ఎస్‌ఎల్పీ మాజీ మంత్రి, డిప్యూటీ ఫ్లోర్‌లీడర్‌ హరీశ్‌రావు విమర్శించారు. ఇందిరమ్మ, రాజీవ్‌గాంధీ పేర్లతో పథకాలు ప్రకటిస్తే సరిపోదని, వాటి ద్వారా ప్రజలకు ఇచ్చిన హామీలను నెరవేర్చినప్పుడే వారికి నిజమైన గౌరవం ఇచ్చినట్టవుతుందని పేర్కొన్నారు. హైదరాబాద్‌ పర్యటనలో ఉన్న కాంగ్రెస్‌ అగ్రనేత రాహుల్‌గాంధీ..

రేవంత్‌ సర్కార్‌ ప్రవేశపెట్టిన మూడు బడ్జెట్లపై సమీక్షించి, హామీల అమలుపై నిలదీయాలని శనివారం ‘ఎక్స్‌’ వేదికగా డిమాండ్‌ చేశారు. ఎస్సీ, ఎస్టీ, బీసీ, మైనారిటీ నిరుద్యోగ యువత కోసం ‘రాజీవ్‌ యువవికాసం’ కింద రూ.6 వేల కోట్లు కేటాయిస్తామని 2025-26 బడ్జెట్‌లో ప్రకటించి, 2026-27 బడ్జెట్‌లోనూ అదే మొత్తాన్ని ప్రస్తావించారని హరీశ్‌రావు గుర్తుచేశారు. బడ్జెట్‌ పత్రాల్లో వేల కోట్ల కేటాయింపులు కనిపిస్తున్నా క్షేత్రస్థాయిలో నిధుల విడుదల, పథకం అమలు కావడం లేదని మండిపడ్డారు. తెలంగాణ ప్రజలకు కావాల్సింది జిమ్మికులు కాదని, హామీల అమలు, సుపరిపాలన, ప్రభుత్వ జవాబుదారీతనమని వ్యాఖ్యానించారు. భూమిలేని వ్యవసాయ కూలీలకు ఏడాదికి రూ.12 వేల ఆర్థిక సాయం అందిస్తామని ప్రకటించిన ‘ఇందిరమ్మ ఆత్మీయ భరోసా’ పథకం మూడు బడ్జెట్లు గడిచినా అమలుకు నోచుకోలేదని దుయ్యబట్టారు.