రంగు మారితే పాడైపోయినట్టే!

ప్యాక్‌ చేసిన ఆహార పదార్థాల నాణ్యత ఎంత? ఎన్ని రోజుల అవి చెడిపోకుండా ఉంటాయి? చెడిపోయేవి ఉంటే కొనేకంటే ముందే గుర్తించేదెలా? ఆహార పదార్థాల నాణ్యతను ప్యాకెట్‌ కవర్‌ ఆధారంగా తెలుసుకొనే వీలున్నదా? ఇలాంటి ప్రశ్నలకు సెంట్రల్‌ ఫుడ్‌ టెక్నాలజికల్‌ రిసెర్చ్‌ ఇన్‌స్టిట్యూట్‌ సమాధానం చెప్పేలా సరికొత్త ప్యాకేజ్‌ టెక్నాలజీని అభివృద్ధి చేసింది.

• ఆహార పదార్థాల నాణ్యతను తెలిపే స్మార్ట్‌ ప్యాకేజింగ్‌ టెక్నాలజీ
• సెంట్రల్‌ ఫుడ్‌ టెక్నాలజికల్‌ రిసెర్చ్‌ ఇన్‌స్టిట్యూట్‌ అభివృద్ధి

హైదరాబాద్‌ సిటీబ్యూరో, జూన్‌ 26 (నమస్తే తెలంగాణ): ప్యాక్‌ చేసిన ఆహార పదార్థాల నాణ్యత ఎంత? ఎన్ని రోజుల అవి చెడిపోకుండా ఉంటాయి? చెడిపోయేవి ఉంటే కొనేకంటే ముందే గుర్తించేదెలా? ఆహార పదార్థాల నాణ్యతను ప్యాకెట్‌ కవర్‌ ఆధారంగా తెలుసుకొనే వీలున్నదా? ఇలాంటి ప్రశ్నలకు సెంట్రల్‌ ఫుడ్‌ టెక్నాలజికల్‌ రిసెర్చ్‌ ఇన్‌స్టిట్యూట్‌ సమాధానం చెప్పేలా సరికొత్త ప్యాకేజ్‌ టెక్నాలజీని అభివృద్ధి చేసింది. మైసూర్‌లోని ప్రధాన కేంద్రంగా, హైదరాబాద్‌లో రిసోర్స్‌ సెంటర్‌ ఆధారంగా ఆహార ఉత్పత్తులపై అధ్యయనం చేసే ఈ సంస్థ.. తాజాగా ఆహార నాణ్యతను ప్యాకెట్‌ ఆధారంగా గుర్తించే విధానాన్ని అందుబాటులోకి తీసుకొచ్చింది. పాలపై చేసిన అధ్యయనం ఆధారంగా లాక్టోబాసిల్లస్‌ పెరుగుదలను బట్టి ప్యాకేజ్‌ లేబుల్‌పై ఉండే క్వాలిటీ ఇండికేటర్‌ రంగు మారిపోయేలా, స్మార్ట్‌ ప్యాకేజింగ్‌ విధానాన్ని రూపొందించింది. దీంతో పాలు నాణ్యత ప్రమాణాలకు లోబడి ఉన్నాయా? తదితర అంశాలను ప్యాకింగ్‌ టెక్నాలజీ ద్వారా తెలుసుకునే వీలు ఉంటుందని సీఎఫ్‌టీఆర్‌ఐ వర్గాలు తెలిపాయి.

నాణ్యత తెలిసిపోతుందిలా..

ప్యాకెట్‌ లోపల, బయట ఏర్పాటు చేసిన ఇండికేటర్లు నాణ్యత సూచికలుగా పనిచేస్తాయి. ప్యాకేజింగ్‌ చేసిన తర్వాత మారిపోయే ఆహార నాణ్యతను బట్టి లేబుల్‌ ఇండికేటర్‌ రంగులో మార్పులు వస్తాయి. దీని ద్వారా కొనుగోలు చేయకముందే నాణ్యతను తెలుసుకోవచ్చు. ప్యాక్‌ కవర్‌ లోపల ఉండే మెంబ్రేన్‌.. ఫిల్టర్‌గా పనిచేసి ఆహారంలో వస్తున్న మార్పులను ఎప్పటికప్పుడు గుర్తించి ఇండికేట్‌ చేస్తుంది.