హైదరాబాద్ సిటీబ్యూరో, ఫిబ్రవరి 15 (నమస్తే తెలంగాణ): వందకు పైగా కాళ్లు, చూడగానే ఒళ్లు గగుర్పాటు కలిగించే విధంగా ఉండే కీటకం జెర్రి విషంలో ఔషధ గుణాలు ఉంటాయని సీసీఎంబీ పరిశోధకులు పేర్కొన్నారు. వర్షాకాలం, తడి నేలల్లో ఎక్కువగా కనిపించే ఈ విషపురుగులో పలు వ్యాధులను నయంచేసే గుణం ఉన్నట్టు తమ అధ్యయనంలో వెల్లడైందని తెలిపారు. జెర్రి తన సంతానాన్ని రక్షించుకొనేందుకే విషాన్ని ప్రయోగిస్తుందని అన్నారు.
ప్రపంచవ్యాప్తంగా 3,200కుపైగా శతపాది (జెర్రి) జాతులకు చెందిన జీవులు ఉన్నాయని, వీటిలో న్యూరోటాక్సిక్, సైటో టాక్సిక్ ప్రొటీన్లు, పప్టైడ్ల కాక్టెయిల్ ఉంటుందని పరిశోధకులు తెలిపారు. జెర్రీ కాటుతో మనుషుల్లో చలి జ్వరం, బలహీనత, వాపు, చర్మ సమస్యలు, ఎలర్జీ, రక్తస్రావం, తీవ్రమైన నొప్పి వంటి రుగ్మతలు వస్తాయని, అయితే మరణాలు అరుదుగా సంభవిస్తాయని పేర్కొన్నారు.
అదే సమయంలో ఆ విషంలో కణతులు, దగ్గు, గజ్జి, గుండె సంబంధిత వ్యాధులను కట్టడి చేసేందుకు అవసరమైన రసాయనిక మిశ్రమాలు ఉన్నాయని తెలిపారు. ఇందుకు శాస్త్రీయ, చారిత్రక ఆధారాలు ఉన్నాయని అన్నారు. చరక సంహితలో శతపాది విష గుణాల గురించి రాసి ఉందని, చైనా సంప్రదాయ వైద్యంలోనూ జెర్రి విషాన్ని ఉపయోగిస్తారని తెలిపారు. ఆ ఔషధ గుణాల తీవ్ర ఎంత తెలుసుకొనేందుకు మరింత లోతైన అధ్యయనం చేయాల్సి ఉందని పేర్కొన్నారు.