వామ్మో సైన్సా.. మాకొద్దు..

సైన్స్‌.. మానవాభివృద్ధికి మూలం. నేడు మనం అనుభవిస్తున్న సుఖాలకు..విలాసాలకు సైన్సే కారణం.

• డిగ్రీలో సైన్స్‌ కోర్సులకు అబ్బాయిలు నో
• ఆర్ట్స్‌ కోర్సుల్లోనే అత్యధిక ప్రవేశాలు
• ముగిసిన డిగ్రీ అడ్మిషన్లు
• ఈ ఏడాదిలో వివిధ డిగ్రీ కోర్సుల్లో 2.10లక్షల మంది విద్యార్థుల చేరిక

హైదరాబాద్‌, డిసెంబర్‌ 5 (నమస్తే తెలంగాణ) : సైన్స్‌.. మానవాభివృద్ధికి మూలం. నేడు మనం అనుభవిస్తున్న సుఖాలకు..విలాసాలకు సైన్సే కారణం. ఇలాంటి సైన్స్‌ మానవ జీవితంతో పెనవేసుకుపోయింది. కానీ, ఇంతటి ప్రాధాన్యం ఉన్న సైన్స్‌ సంబంధ కోర్సులంటేనే ఈ తరం అబ్బాయిలు జంకుతున్నారు. వామ్మో మాకొద్దంటున్నారు. ఈ కోర్సుల్లో చేరేందుకు ఆసక్తి చూపడం లేదు. సులభంగా ఉండే ఆర్ట్స్‌ కోర్సులనే ఇష్టపడుతున్నారు. ఈ ఏడాది బీఎస్సీ బీజెడ్‌సీ, బయో కెమిస్ట్రీ, కెమిస్ట్రీ, జెనెటిక్స్‌, బయాలజీ వంటి సైన్స్‌ కోర్సుల్లో అబ్బాయిల అడ్మిషన్లు 24.21శాతం మాత్రమే. అదే అమ్మాయిలు 75.59 శాతం ఈ కోర్సులనే ఇష్టపడి తీసుకొన్నారు. ఇదే తరహాలో బీఎస్సీ ఫిజికల్‌ సైన్సెస్‌లో అమ్మాయిలు 55.17శాతం చేరితే, అబ్బాయిలు 44.59 శాతం ప్రవేశం పొందారు.

ఆర్ట్స్‌లో అబ్బాయిలదే ఆధిపత్యం..
ఆర్ట్స్‌ కోర్సుల్లో మాత్రం అబ్బాయిలదే పైచేయిగా కనిపిస్తున్నది. బీఏలో 59.56 శాతం, బీకాంలో 54.95 శాతం అబ్బాయిలే ప్రవేశాలు పొందారు. ఈ ఏడాది మొత్తం 2.10 లక్షల మంది విద్యార్థులు డిగ్రీ ఫస్టియర్‌లో ప్రవేశాలు పొందారు. మొత్తం అడ్మిషన్లలో 52.06 శాతం అమ్మాయిలే ఉండగా, 47.94 శాతం అబ్బాయిలున్నారు. కోర్సుల వారీగా తీసుకొంటే ఈ ఏడాది బీకాం కోర్సులోనే అత్యధికంగా 87వేలకు పైగా మంది విద్యార్థులు జాయిన్‌ అయ్యారు. డిగ్రీలో మొత్తం 4.20 లక్షల సీట్లకు ఈ ఏడాది 50శాతమే సీట్లే నిండాయి.