Agnishikha | దివ్య ఔషధం అగ్నిశిఖ.. నల్లమలలో విరివిగా లభిస్తున్న తీగజాతి మొక్క

ఆయుర్వేద వైద్యంలో అడవి నాభిగా ప్రసిద్ధి చెందిన అగ్నిశిఖ మొక్కలు నల్లమలలోని పులిచెరువు, తుమ్మలబైలు తదితర ప్రాంతాల్లో విరివిగా పెరుగుతున్నాయి.

• ఆయుర్వేదంలో వినియోగం
• అడవి నాభిగా ప్రసిద్ధి చెందిన తీగజాతి మొక్క
• నల్లమలలో విరివిగా లభ్యం

Agnishikha | హైదరాబాద్‌, జూలై 7 (నమస్తే తెలంగాణ) : ఆయుర్వేద వైద్యంలో అడవి నాభిగా ప్రసిద్ధి చెందిన అగ్నిశిఖ మొక్కలు నల్లమలలోని పులిచెరువు, తుమ్మలబైలు తదితర ప్రాంతాల్లో విరివిగా పెరుగుతున్నాయి. దీనిని ఇంగ్లిష్‌లో ఫ్లేమ్‌లిల్లీ, ఫైర్‌లిల్లీ, గ్లోరియసాలిల్లీ అని, వాడుక భాషలో నాగేటిగడ్డ, నీరుపిప్పిలి అని పిలుస్తుంటారు. వీటి పుష్పాలు ఎరుపు, నారింజ, తెలుపు, పసుపు రంగుల కలబోతగా దర్శనమిస్తాయి. ఆయుర్వేదంలో దీనిని దివ్య ఔషధంగా భావిస్తారు. దీని కాండం, ఆకులు, విత్తనాలు, పండ్లు, పూలు, దుంపలు అన్నీ విషపూరితమైనవే.

ఇందులో ‘కోల్చీసిన్‌’ అనే ఆల్కలాయిడ్‌ ఉంటుంది. దీనిని పాము, తేలుకాటుకు విరుగుడుగా, చర్మవ్యాధులు, కిడ్నీ సమస్య, గాయాలకు మందుగా వాడుతారు. దీర్ఘకాలిక రోగాలతోపాటు కుష్టుతో కలిగే గాయాలు, కడుపు నొప్పి నివారణకు వినియోగిస్తారు. ఆత్మన్యూనత వంటి మానసిక రోగాలతోపాటు రక్తపోటు నివారణకు చక్కగా పని చేస్తుందని, గర్భధారణ అవకాశాలను మెరుగుపర్చుతుందని ఆయుర్వేద నిపుణులు పేర్కొంటున్నారు.