Tomato Price | సామాన్యులకు గుడ్‌న్యూస్‌.. దిగొస్తున్న టమాట ధరలు.. 63కే కిలో!

Tomato Price | దాదాపు రెండు నెలలుగా కొండెక్కి కూర్చున్న టమాటా ధరలు నెమ్మదిగా దిగివస్తున్నాయి. మార్కెట్లోకి టమాటా రాక పెరగడంతో రెండు రోజులుగా తగ్గుముఖం పట్టాయి.

Tomato Price | హైదరాబాద్‌, ఆగస్టు 8 (నమస్తే తెలంగాణ): దాదాపు రెండు నెలలుగా కొండెక్కి కూర్చున్న టమాటా ధరలు నెమ్మదిగా దిగివస్తున్నాయి. మార్కెట్లోకి టమాటా రాక పెరగడంతో రెండు రోజులుగా తగ్గుముఖం పట్టాయి. సోమవారం వరకు రూ.4,300 పలికిన 23 కేజీల బాక్సు ధర ప్రస్తుతం రూ. 2,300కి తగ్గింది. నాణ్యతను బట్టి బాక్సు ధర రూ.1500 నుంచి రూ.2,300 వరకు పలుకుతున్నది. రైతు బజార్లలో కిలో టమాటా రూ. 65-100 మధ్య పలుకుతోంది. బయట మార్కెట్లో మాత్రం రూ. 120-140 మధ్య ఉంది.

పది రోజుల క్రితం నగరంలోని హోల్‌సేల్‌ మార్కెట్‌కు 850 క్వింటాళ్ల టమాటా రాగా సోమవారం ఏకంగా 2,450 క్వింటాళ్ల టమాటా వచ్చింది. ఆంధ్రప్రదేశ్‌లోని చిత్తూరు, అనంతరంపురంతోపాటు కర్ణాటక నుంచి కూడా హైదరాబాద్‌కు టమాటాలు వస్తున్నాయి. దీనికితోడు రంగారెడ్డి, చేవెళ్ల, నవాబ్‌పేట, మెదక్‌, వికారాబాద్‌ జిల్లాల నుంచి కూడా మార్కెట్‌కు టమాటాలు పోతెత్తడంతో ధర తగ్గుముఖం పట్టింది. ఈ నెలాఖరుకు కిలో టమాటా రూ. 50కి తగ్గే అవకాశం ఉందని వ్యాపారులు చెబుతున్నారు.

దొంగల బెడదతో టమాటా పంటకు సీసీ కెమెరాలు

విలువైన వస్తువుల జాబితాలో టమాటా చేరిపోయింది. ఇటీవలి కాలంలో వరుసగా టమాటాల చోరీ ఘటనలు చోటుచేసుకొంటున్నాయి. ఈ నేపథ్యంలో మహారాష్ట్రలోని ఔరంగాబాద్‌ జిల్లా షాపూర్‌ బంజర్‌కు చెందిన శరద్‌ రావతే అనే ఓ రైతు తన టమాటా పొలం వద్ద సీసీటీవీ కెమెరాలు ఏర్పాటు చేసుకొన్నాడు. దొంగల బెడద ఎక్కువైందని ఆందోళన వ్యక్తం చేశారు.