పారదర్శకంగా భూ వేలం

• కేంద్ర ప్రభుత్వ సంస్థ ఎంఎస్‌టీసీ ద్వారా ఈ-ఆక్షన్‌
• అన్నిదశల్లో పనులు సాఫీగా సాగేందుకు 4 కమిటీలు
• భూముల గుర్తింపు బాధ్యతలు జిల్లా కలెక్టర్లకు అప్పగింత
• వేలానికి ముందే లే ఔట్లకు అన్ని వసతులు, అనుమతులు
• స్థలం కొన్నవారికి ఏడు రోజుల్లో పత్రాలు అందజేత
• మార్గదర్శకాలు జారీచేసిన సీఎస్‌ సోమేశ్‌కుమార్‌

హైదరాబాద్‌, జూన్‌ 10 (నమస్తే తెలంగాణ): వివిధ శాఖల వద్ద నిరుపయోగంగా ఉన్న భూములను వేలం వేసేందుకు ప్రభుత్వం చర్యలు వేగవంతం చేసింది. భూముల గుర్తింపు, అభివృద్ధి, వేలానికి నిర్దిష్ట మార్గదర్శకాలను ప్రభుత్వ ప్రధాన కార్యదర్శి సోమేశ్‌కుమార్‌ గురువారం జారీచేశారు. వేలం బాధ్యతను నోడల్‌ ఏజెన్సీకి అప్పగించిన ప్రభుత్వం, ఈ ప్రక్రియను సజావుగా పారదర్శకంగా నిర్వహించేందుకు నాలుగు కమిటీలను ఏర్పాటుచేసింది. జిల్లాల్లో ప్రజా అవసరాలకు ఉపయోగపడని భూములను కలెక్టర్లు సేకరించాల్సి ఉంటుంది. కనీసం వెయ్యి ఎకరాలకు తగ్గకుండా ల్యాండ్‌బ్యాంకు ఏర్పాటుచేయనున్నారు. మార్కెట్‌ డిమాండ్‌, ధరలను బట్టి భూములను ఈ-వేలం ద్వారా అమ్మాలని ప్రభుత్వం సూచించింది. గుర్తించిన భూములను వేలానికి ముందే లేఔట్స్‌గా మార్చి టీఎస్‌ బీపాస్‌ ద్వారా అన్ని అనుమతులు ఇచ్చేలా చర్యలు తీసుకొంటారు. లేఅవుట్స్‌లకు అన్నిరకాల వసతులు ఏర్పాటు చేస్తారు.

ఇవీ మార్గదర్శకాలు..

• ముందుగా ఎలాంటి న్యాయ వివాదం లేని భూముల వివరాలను సేకరించి హద్దులు ఏర్పాటుచేయాలి.
• సేకరించిన భూములను బహుళ అవసరాలకు ఉపయోగపడేలా నోటి ఫై చేయాలి. అవసరమైన వాటికి హెచ్‌ఎండీఏ, జీహెచ్‌ఎంసీ అనుమతులు వెంటనే వచ్చేలా చర్యలు తీసుకోవాలి.
• అవసరమైన అన్ని అనుమతులను టీఎస్‌-బీపాస్‌ ద్వారా తీసుకోవాలి. దరఖాస్తు చేసిన వారంలోపే ఫైర్‌ ఎన్వోసీ, ఈసీ/సీఎఫ్‌ఈ వచ్చేలా చూడాలి.
• ఈ-వేలం షెడ్యూల్‌ జారీకి నోడల్‌ డిపార్ట్‌మెంట్‌కు అధికారాలు.
• స్థానిక మార్కెట్‌ రేట్లకు అనుగుణంగా వేలం వేసే భూములకు ధరలను నోడల్‌ ఏజెన్సీ నిర్ణయించాలి. అవసరమైతే కన్సల్టెంట్స్‌ను నియమించుకోవచ్చు. మార్కెట్‌ డిమాండ్‌, ధరలను బట్టి భూముల అమ్మకానికి నోటిఫికేషన్‌ ఇవ్వాలి.
• ఈ-వేలం కోసం కేంద్రప్రభుత్వ సంస్థ ఎంఎస్‌టీసీని నియమించుకొనేందుకు అనుమతి. అవసరమైతే ప్రైవేటు ఏజెన్సీలను కూడా నియమించుకోవచ్చు. నోడల్‌ ఏజెన్సీ డిపార్ట్‌మెంట్‌లో ఈ-వేలం సెల్‌ ఏర్పాటు చేయాలి.
• బిడ్స్‌ ఫైనల్‌ చేసేందుకు నోడల్‌ డిపార్ట్‌మెంట్‌ ప్రిన్సిపల్‌ సెక్రటరీ ఆధ్వర్యంలో కమిటీ.
• వేలంలో భూమి దక్కించుకొన్న వ్యక్తి డబ్బులు చెల్లించిన మూడు వారాల్లో ఆయా జిల్లాల కలెక్టర్లు సదరు భూమిని అప్పగించాలి.
• నోడల్‌ డిపార్ట్‌మెంట్‌కు ఇచ్చిన అధికారాలు
• భూముల ధరను నిర్ణయించడం.
• నోటిఫికేషన్‌ ఇవ్వడం.
• ఈ-వేలం కోసం ఎంఎస్‌టీసీ సేవలు వినియోగించుకోవడం.
• ప్లాట్లు అమ్మగా వచ్చే ఆదాయంలో 2 శాతం నిధులను వివిధ పనులకు ఉపయోగించుకోవడం.
• ఆదాయం నుంచి ఎంఎస్‌టీసీకి చెల్లింపులు.
• బిడ్స్‌ ఫైనల్‌ చేసేందుకు కమిటీ ఏర్పాటు.
• భూముల అమ్మకానికి విధి విధానాలకు ఆమోదం తెలపడం.
• ఈ-వేలం కోసం షెడ్యూల్‌ జారీ చేయడం.
• వేలంలో భూమిని లేదా ప్లాట్‌ను దక్కించుకొన్న బిడ్డర్‌కు ఏడు రోజుల్లో సంబంధిత పత్రాలు అందజేయడం. పారదర్శకంగా భూ వేలం