మనిషిగా పుట్టిన ఎవరైనా ఏదో ఒక పని కచ్చితంగా చేయాలంటారు జానపదులు. అయినా కొందరు చేయాల్సిన పని చేయకుండా తప్పించుకొని తిరుగుతుంటారు. అలాంటి వారిని ఉద్దేశించిన సామెత ‘మేసేటప్పుడు ఎడ్లల్ల.. దున్నేటప్పుడు దూడల్ల!’. ఇది వ్యవసాయ సంబంధమైన పలుకుబడి. దుక్కి దున్నే ఎడ్లకు రైతులు బలవర్ధకమైన దాణా పెడుతుంటారు. వాటితోపాటు కొన్ని ఎడ్లు కలిసి ఆ దాణా మేస్తుంటాయి. అరక కట్టే సమయానికి మాత్రం పొలం పని చెయ్యలేక లేగ దూడల్లోకి వెళ్తుంటాయి. ఇలా పనిని తప్పించుకునే వ్యక్తులు మనకు తారసపడుతూనే ఉంటారు. తినేటప్పుడు దుక్కలాగా కడుపునిండా తిని.. పని చేయాల్సి వచ్చినప్పుడు సాకులు చెప్పి వాయిదా వేస్తుంటారు.
– డప్పు రవి
బొమ్మలు: మృత్యుంజయ్