WPL 2024, GG vs DC | మహిళల ప్రీమియర్ లీగ్ (డబ్ల్యూపీఎల్) రెండో సీజన్లో మూడు మ్యాచ్లు ఆడి హ్యాట్రిక్ ఓటములు నమోదుచేసిన గుజరాత్ జెయింట్స్ తొలి విజయం కోసం పడరాని పాట్లు పడుతోంది. బ్యాటింగ్తో పాటు బౌలింగ్లోనూ వైఫల్య ప్రదర్శనలతో విసుగు తెప్పిస్తున్న ఆ జట్టు.. నేడు ఢిల్లీ క్యాపిటల్స్తో తలపడనుంది. మరో రెండు రోజుల్లో టోర్నీ ఢిల్లీకి షిఫ్ట్ కాబోతున్న నేపథ్యంలో గుజరాత్కు బెంగళూరులో ఇదే ఆఖరి మ్యాచ్. చిన్నస్వామి స్టేడియం వేదికగా జరుగుతున్న ఈ మ్యాచ్లో గుజరాత్ సారథి బెత్ మూనీ టాస్ గెలిచి మొదట ఫీల్డింగ్ ఎంచుకుంది. ఢిల్లీ క్యాపిటల్స్ మొదట బ్యాటింగ్కు రానుంది.
పాయింట్ల పట్టికలో గత సీజన్ మాదిరిగానే అట్టడుగున ఉన్న గుజరాత్కు ఈ సీజన్లో ఢిల్లీతో ఇదే తొలి మ్యాచ్. కాగా రెండో సీజన్లో భాగంగా ఆడిన తొలిమ్యాచ్లో ఓడినా తర్వాత పుంజుకున్న ఢిల్లీ.. వరుసగా రెండు మ్యాచ్లలో గెలిచి నేడు హ్యాట్రిక్ కొట్టాలని భావిస్తోంది. పాయింట్ల పట్టికలో రెండో స్థానంలో ఉన్న ఆ జట్టు ఈ మ్యాచ్లో గెలిస్తే అగ్రస్థానాన్ని కైవసం చేసుకోవచ్చు. షఫాలీ వర్మ, మెగ్లానింగ్, అలీస్ క్యాప్సీలు మంచి టచ్లో ఉండగా రోడ్రిగ్స్ తడబడుతోంది. ఆల్ రౌండర్ మరిజన్నె కాప్ ఆ జట్టు విజయాలలో కీలకపాత్ర పోషిస్తోంది. ఈ మ్యాచ్లో గెలిచి ఢిల్లీలోకి అడుగుపెట్టాలని క్యాపిటల్స్ ప్రణాళికలు రచిస్తోంది.
తుది జట్లు : ఈ మ్యాచ్లో గుజరాత్, ఢిల్లీలు తలా రెండు మార్పులతో బరిలోకి దిగుతున్నాయి. గుజరాత్ ఆటగాళ్లు హర్లీన్ డియెల్, స్నేహ్ రాణాలు ఈ మ్యాచ్లో ఆడటం లేదు. ఢిల్లీ టీమ్లో మరిజన్నె కాప్, మిన్ను మణిలు మిస్ అయ్యారు.
గుజరాత్ జెయింట్స్ : బెత్ మూనీ (కెప్టెన్), లారా వోల్వార్ట్డ్, వేదా కృష్ణమూర్తి, ఫొబె లిచ్ఫీల్డ్, ఆష్లే గార్డ్నర్, డయాలన్ హేమలత, క్యాథ్రిన్ బ్రైస్, తరన్నుమ్ పఠాన్, తనూజా కన్వర్, మన్నత్ కశ్యప్, మేఘనా సింగ్
ఢిల్లీ క్యాపిటల్స్ : మెగ్ లానింగ్ (కెప్టెన్), షఫాలీ వర్మ, అలీస్ క్యాప్సీ, జెమీమా రోడ్రిగ్స్, అన్నాబెల్ సదర్లండ్, జెస్ జొనాసెన్, అరుంధతి రెడ్డి, తానియా భాటియా, టిటాస్ సాధు, శిఖా పాండే, రాధా యాదవ్