Visit:
న్యూఢిల్లీ: ఇండియ‌న్ టీమ్ మాజీ ఓపెన‌ర్ వీరేంద్ర సెహ్వాగ్‌కు చ‌మ‌త్కారం కాస్త ఎక్కువే. క్రికెట్ నుంచి రిటైరైన త‌ర్వాత ట్విట‌ర్‌లో అత‌డు చేస్తున్న ఫ‌న్నీ ట్వీట్లు వీరూకి మ‌రింత మంది అభిమానుల‌ను సంపాదించిపెట్టాయి. తాజాగా బుధ‌వారం ధోనీ బ‌ర్త్ డే సంద‌ర్భంగా అత‌డు త‌న‌దైన స్టైల్లో విషెస్ చెప్పాడు. వ‌రుస‌గా ఆరు ట్వీట్లు చేసిన సెహ్వాగ్‌.. ఒక్కోదాంట్లో ఒక్కో స్టైల్లో ధోనీకి విష్ చేయ‌డం విశేషం. మ‌హేంద్ర అంటే ఆకాశానికి దేవుడు అని అర్థం. త‌న భారీ షాట్ల‌తో ఆ ఆకాశాన్ని ఆనంద‌ప‌రిచిన ధోనీ.. ఎంతో మంది అభిమానుల అభిమానాన్ని సంపాదించి ఇటు భూమినీ ప‌ర‌వ‌శింప‌జేశాడు అని వీరూ త‌న తొలి ట్వీట్‌లో ప్ర‌శంస‌లు కురిపించాడు.
ఇక 2016 నుంచి తాను ధోనీకి ట్విట‌ర్‌లో చెబుతున్న విషెస్‌కు సంబంధించిన ట్వీట్ల‌న్నింటినీ వీరూ పోస్ట్ చేశాడు. 2016లో అసాధ్యాన్ని సుసాధ్యం చేసే ధోనీ అని ట్వీట్ చేసిన సెహ్వాగ్‌.. 2017లో నీ హెలికాప్ట‌ర్ షాట్ ఇలాగే ఎగురుతూ మా గుండెల్లో ల్యాండ‌వ్వాల‌ని విష్ చేశాడు. 2018లో స్టంపింగ్‌ను త‌ప్పించుకోవ‌డానికి దూరం నుంచి కాలు క్రీజులో పెడుతున్న ధోనీ ఫొటోను షేర్ చేస్తూ.. నీ జీవితం ఈ స్ట్రెచ్ కన్నా పెద్ద‌గా ఉండాల‌ని కోరుకున్నాడు. 2019లో ధోనీకి ఇష్ట‌మైన నంబ‌ర్ 7 గురించి చెబుతూ పోస్ట్ చేశాడు.
