Cristiano Ronaldo | పోర్చుగల్ ఫుట్బాల్ స్టార్ క్రిస్టియానో రొనాల్డో గురించి తెలియనివారు ఉండరు. అతని ఆటతీరుతో ప్రపంచ వ్యాప్తంగా అభిమానులను సొంతం చేసుకున్నారు. అంతపెద్ద స్టార్ ప్రస్తుతం ఓ విచిత్రమైన సమస్యతో బాధపడుతున్నాడట. అయితే, అది ఆటకు సంబంధించింది కాదు. తనకు, కుటుంబ సభ్యులకు రుచికరంగా వంట చేసిపెట్టే వ్యక్తి కోసం గత కొన్ని రోజులుగా వెతుకుతున్నా ఎవరూ దొరకడం లేదట. దీంతో అతను తీవ్ర నిరాశతో ఉన్నాడు.
రొనాల్డో తన కెరీర్ చివర్లో కుటుంబంతో కలిసి పోర్చుగల్కు షిఫ్ట్ అవ్వాలనుకుంటున్నాడు. ఈ మేరకు ఇప్పటికే అక్కడ ఓ విలాసవంతమైన ఇంటిని నిర్మించే పనిలో పడ్డాడట. సెప్టెంబర్ 2021లో ఇంటి కోసం భూమిని కొనుగోలు చేసి నిర్మాణం చేపట్టినట్లు తెలుస్తోంది. జూన్ 2023 నాటికి ఆ ఇంటి నిర్మాణం పూర్తవుతుందని సమాచారం. ఆ ఇంటి ఖరీదు 17 మిలియన్ పౌండ్స్. అంటే మన ఇండియన్ కరెన్సీలో ఏకంగా రూ.170 కోట్లన్న మాట. మరికొన్ని రోజుల్లో భార్య, పిల్లలతో రొనాల్డో ఆ ఇంటికి షిఫ్ట్ అవ్వాలని భావిస్తున్నట్లు సమాచారం.
అయితే, పర్సనల్ చెఫ్ కోసం చాలా రోజులుగా వెతుకుతున్నా ఎవరూ దొరకడం లేదట. పోర్చుగీస్ ఆహారం, సుషీ వంటి ఇంటర్నేషనల్ ఫుడ్స్ను వండగల సత్తా ఉన్న చెఫ్కోసం వెతుకుతున్నారట. ఇక చెఫ్గా చేరేవారికి భారీగా జీతం ఇచ్చేందుకు కూడా సిద్ధంగా ఉన్నట్లు తెలుస్తోంది. తన వద్ద చెఫ్గా చేరిన వ్యక్తికి నెలకు 4,500 పౌండ్లు ఇచ్చేందుకు కూడా వెనకాడటం లేదట. అంటే మన ఇండియన్ కరెన్సీలో నెలకు రూ.4.5లక్షలన్నమాట. ఈ లెక్కన ఏడాదికి రూ.54లక్షలు. ఈ ప్యాకేజీ పెద్ద సాఫ్ట్వేర్ ఇంజనీర్లకు కూడా ఉండకపోవచ్చు.
ఇక, రొనాల్డో ప్రస్తుతం సౌదీ అరేబియాలో ఉన్నాడు. సౌదీ అరేబియా క్లబ్ అల్ నాసర్ తరఫున ఆడేందుకు ఇటీవల రొనాల్డో అక్కడికి వెళ్లాడు. మాంచెస్టర్ యునైటెడ్ యాజమాన్యంతో విభేదాల కారణంగా ఈ ఐరోపా క్లబ్తో రొనాల్డో బంధాన్ని తెంచుకున్న విషయం తెలిసిందే. ఆ తర్వాత సౌదీలో ప్రముఖ క్లబ్గా పేరొందిన అల్ నసర్..రొనాల్డోతో జూన్ 2025 వరకు ఒప్పందం కుదుర్చుకుంది. ఏడాదికి 200 మిలియన్ యూరోల చొప్పున మొత్తంగా రికార్డు స్థాయిలో 4,400 కోట్ల రూపాయలతో డీల్ కుదిరింది. సాకర్ చరిత్రలో ఒక ప్లేయర్కు దక్కనున్న అత్యధిక మొత్తం ఇదే కావడం విశేషం.