పారిస్: మట్టికోట మహారాజు రఫేల్ నాదల్.. మరో టైటిల్కు చేరువయ్యాడు. తనకు అచ్చొచ్చిన రోలాండ్ గారోస్లో 14వసారి చాంపియన్గా నిలిచేందుకు స్పెయిన్ బుల్ నాదల్ రెండడుగుల దూరంలో నిలిచాడు. ఫ్రెంచ్ ఓపెన్ పురుషుల సింగిల్స్ క్వార్టర్ ఫైనల్లో నాదల్ 6-2, 4-6, 6-2, 7-6 (7/4)తో డిఫెండింగ్ చాంపియన్, ప్రపంచ నంబర్వన్ నోవాక్ జొకోవిచ్ (సెర్బియా) ను చిత్తు చేసి సెమీస్లో అడుగుపెట్టాడు. ఇప్పటి వరకు ఫ్రెంచ్ ఓపెన్లో 13 టైటిల్స్ నెగ్గిన నాదల్.. సెమీస్లో జ్వెరెవ్ (జర్మనీ)తో తలపడనున్నాడు. పురుషుల టెన్నిస్లో అత్యధిక (21) గ్రాండ్స్లామ్స్ ఖాతాలో వేసుకున్న నాదల్.. క్వార్టర్స్ పోరులో జొకోపై సంపూర్ణ ఆధిపత్యం కనబర్చాడు. 4 గంటలా 12 నిమిషాల పాటు సాగిన మ్యాచ్ ఫైనల్ కాని ఫైనల్ను తలపించగా.. ఇరువురు ఆటగాళ్లు కొదమ సింహాల్లా పోరాడారు. జొకో 5 ఏస్లు సంధించగా.. నాదల్ మూడు కొట్టాడు. చెరో 4 డబుల్ ఫాల్ట్స్ చేయగా.. నాదల్ 7 బ్రేక్ పాయింట్లతో సత్తాచాటాడు. మహిళల క్వార్టర్స్లో టాప్ సీడ్ స్వియాటెక్ 6-3,6-2తో జెస్సిక పెగులా పై గెలిచి సెమీస్లో అడుగుపెట్టింది.