Neymar : బ్రెజిల్ ఫుట్బాలర్ అభిమానులకు పెద్ద షాక్. ఫిఫా వరల్డ్ కప్ క్వాలిఫయర్స్లో గాయపడిన స్టార్ ఫుట్బాలర్ నెయ్మర్(Neymar) ఏడాది పాటు ఆటకు దూరం కానున్నాడు. ఉరుగ్వేతో మ్యాచ్ సమయంలో నెయ్మర్ ఎడమ మోకాలికి (ఆంటీరియర్ క్రుసియేట్ లిగమెంట్) దెబ్బ తగలడంతో విలవిలలాడాడు. నడవలేని స్థితిలో ఉన్న అతడిని గ్రౌండ్ సిబ్బంది స్ట్రెచర్ మీద తీసుకెళ్లారు.
ఎంఆర్ఐ స్కాన్ అనంత రం నెయ్మర్కు గాయం తీవ్రత ఎక్కువ ఉందని.. అత్యవసరంగా సర్జరీ చేయాలని వైద్యులు సూచించడంతో వెంటనే ఆపరేషన్ చేశారు. శనివారం నాడు డిశ్చార్జ్ కానున్న అతడు కోలుకునేందుకు ఏడాది పట్టనుంది. ‘నెయ్మర్కు సర్జరీ విజయవంతం అయింది. అతడు మరో 24 నుంచి 48 గంటలు ఆస్పత్రిలోనే ఉండే అవకాశం ఉంద’ని బ్రెజిల్ టీమ్ డైరెక్టర్ రోడ్రిగో లాస్మర్ ఓ ప్రకటనలో తెలిపాడు.
సర్జరీ తర్వాత ఆస్పత్రి బెడ్మీద ఉన్న ఫొటోలను నెయ్మర్ సోషల్మీడియాలో పెట్టాడు. వాటికి ‘అంతా సవ్యంగానే ఉంది’ అని క్యాప్షన్ రాశాడు. ఈమధ్యే పారిస్ సెయింట్ జర్మనీ క్లబ్ను వీడిన నెయ్మర్ సౌదీ అరేబియాకు చెందిన అల్ హిలాల్ క్లబ్కు మారిన విషయం తెలిసిందే. నిరుడు ఖతర్ వేదికగా జరిగిన వరల్డ్ కప్లో నెయ్మర్ బ్రెజిల్ జట్టుకు సారథిగా వ్యవహరించాడు. అయితే.. క్రొయేషియా 4-2తో బ్రెజిల్ ప్రపంచ కప్ ఆశలపై నీళ్లు చల్లింది.