Mohammad Siraj | నంబ‌ర్ 1 బౌల‌ర్ అవుతానని ఊహించ‌లేదు : సిరాజ్

తాను వ‌ర‌ల్డ్ నంబ‌ర్ 1 బౌల‌ర్ అవుతాన‌ని అసలు ఊహించ‌లేద‌ని టీమిండియా స్విగ్ సుల్తాన్ మహ‌మ్మ‌ద్ సిరాజ్ తెలిపాడు. స్పిన్న‌ర్ ర‌విచంద్ర‌న్ అశ్విన్ ఇన్‌స్టాగ్రామ్‌లో వీడియోలో సిరాజ్ వ‌ర‌ల్డ్ నం 1 కావ‌డంపై స్పందించాడు.

Mohammad Siraj : తాను వ‌ర‌ల్డ్ నంబ‌ర్ 1 బౌల‌ర్ అవుతాన‌ని అసలు ఊహించ‌లేద‌ని టీమిండియా స్విగ్ సుల్తాన్ మహ‌మ్మ‌ద్ సిరాజ్ తెలిపాడు. స్పిన్న‌ర్ ర‌విచంద్ర‌న్ అశ్విన్ ఇన్‌స్టాగ్రామ్‌లో వీడియోలో సిరాజ్ వ‌ర‌ల్డ్ నం 1 కావ‌డంపై స్పందించాడు. అశ్విన్ షేర్ చేసిన‌ ఆ వీడియో ఆన్‌లైన్‌లో వైర‌ల్ అవుతోంది. అందులో ‘వ‌న్డేల్లో వ‌ర‌ల్డ్ నంబ‌ర్ 1 బౌల‌ర్ అయినందుకు ఎలా ఫీల‌వుతున్నావు?’ అని ఈ ఆఫ్ స్పిన్న‌ర్ సిరాజ్‌ను అడిగాడు. అందుకు ఈ స్పీడ్‌స్ట‌ర్.. ‘చాలా సంతోషంగా అనిపించింది. నేను వ‌ర‌ల్డ్ నంబ‌ర్ 1 బౌల‌ర్ అవుతాన‌ని అనుకోలేదు’ అని బ‌దులిచ్చాడు. న్యూజిలాండ్ బౌల‌ర్ ట్రెంట్ బౌల్ట్, ఆస్ట్రేలియా పేస‌ర్ హేజిల్‌వుడ్‌ను వెన‌క్కి నెట్టి సిరాజ్ 729 పాయింట్ల‌తో అగ్ర‌స్థానం సొంతం చేసుకున్నాడు.

వ‌న్డేల్లో అత్య‌ధిక వికెట్లు

స్వదేశంలో ఈ మ‌ధ్య జ‌రిగిన‌ శ్రీలంక‌, న్యూజిలాండ్ సిరీస్‌లో సిరాజ్ అద్భుతంగా రాణించాడు. శ్రీ‌లంక‌పై మూడు వ‌న్డేల్లో 9 వికెట్లు ప‌డ‌గొట్టాడు. రెండు సార్లు కెరీర్‌లో తొలి ఐదు వికెట్ల ప్ర‌ద‌ర్శ‌న‌కు వికెట్ దూరంలో నిలిచాడు. భార‌త జ‌ట్టు వ‌న్డే సిరీస్ గెల‌వ‌డంలో ఈ హైద‌రాబాదీ పేస‌ర్ కీల‌క పాత్ర పోషించాడు. పోయిన ఏడాది వ‌న్డేల్లో టీమిండియా త‌ర‌ఫున‌ అత్య‌ధికంగా 23 వికెట్లు తీశాడు. మ‌రో ఐదు రోజుల్లో ప్రారంభం కానున్న బోర్డ‌ర్ – గ‌వాస్క‌ర్ ట్రోఫీలో స‌త్తా చాటేందుకు సిరాజ్ ఉవ్విళ్లూరుతున్నాడు. గాయంతో బుమ్రా దూరం కావ‌డంతో ష‌మీతో క‌లిసి అత‌ను భార‌త బౌలింగ్ ద‌ళాన్ని న‌డిపించ‌నున్నాడు.