IPL 2024 | ‘ఫ్ల‌యింగ్ కిస్’ పేస‌ర్‌పై నిషేధం.. ఈసారి ఏం చేశాడంటే..?

IPL 2024 : ఐపీఎల్ ప‌దిహేడో సీజ‌న్‌లో కోల్‌క‌తానైట్ రైడ‌ర్స్ పేస‌ర్ హ‌ర్షిత్ రానా (Harshit Rana) త‌న ఓవ‌రాక్ష‌న్‌తో వార్త‌ల్లో నిలుస్తున్నాడు. . ఈసారి ఏకంగా మ్యాచ్ ఫీజు మొత్తం కోల్పోవ‌డ‌మే కాకుండా ఒక్క మ్యాచ్ నిషేధానికి గుర‌య్యాడు.

IPL 2024 : ఐపీఎల్ ప‌దిహేడో సీజ‌న్‌లో కోల్‌క‌తానైట్ రైడ‌ర్స్ పేస‌ర్ హ‌ర్షిత్ రానా (Harshit Rana) త‌న ఓవ‌రాక్ష‌న్‌తో వార్త‌ల్లో నిలుస్తున్నాడు. ఒక‌టి రెండు వికెట్లు తీసి నానా హంగామా చేస్తున్న ఈ స్పీడ్‌స్ట‌ర్.. మ‌రోసారి ఐపీఎల్ కోడ్‌ను ఉల్లంఘించాడు. ఈసారి ఏకంగా మ్యాచ్ ఫీజు మొత్తం కోల్పోవ‌డ‌మే కాకుండా ఒక్క మ్యాచ్ నిషేధానికి గుర‌య్యాడు.

అస‌లేం జ‌రిగిందంటే..? స‌న్‌రైజ‌ర్స్ హైద‌రాబాద్ ఓపెన‌ర్ మ‌యాంక్ అగ‌ర్వాల్‌(Mayank Agarwal)కు ‘ఫ్ల‌యింగ్ కిస్’ ఇచ్చి విమ‌ర్శ‌ల పాలైన హ‌ర్షిత్.. తాజాగా ఢిల్లీ క్యాపిట‌ల్స్‌పై త‌న బుద్ది చూపించాడు. ఈడెన్ గార్డెన్స్‌లో అభిషేక్ పొరెల్‌(Abhishek Porel)ను బౌల్డ్ చేసిన ఈ పేస‌ర్ మున‌ప‌టిలా ఫ్ల‌యింగ్ కిస్ ఇవ్వ‌బోయాడు. కానీ, త‌మాయించుకొని పొరెల్‌కు డ‌గౌట్ దారి చూపించాడు.

WATCH 📽️

Fascinating battle ft. Harshit Rana & Abishek Porel#TATAIPL | #KKRvDChttps://t.co/1pX6tVytwF

— IndianPremierLeague (@IPL) April 29, 2024

అయితే.. హ‌ర్షిత్ తీరును మ్యాచ్ రిఫ‌రీ త‌ప్పుప‌డుతూ ఐపీఎల్ క్ర‌మ‌శిక్ష‌ణ క‌మిటీకి నివేదించాడు. క‌మిటీ ముందు హ‌ర‌షిత్ త‌న నేరాన్ని అంగీక‌రించాడు. దాంతో, హైద‌రాబాద్‌పై ఫ్ల‌యింగ్ కిస్ సెల‌బ్రేష‌న్‌తో 60 శాతం ఫీజు కోల్పోయిన అత‌డికి ఈసారి పెద్ద ఝ‌ల‌కే త‌గిలింది. రెండోసారి లెవ‌ల్ 1 పొర‌పాటుకు పాల్ప‌డినందున‌ మ్యాచ్ ఫీజులో వంద శాతం కోతతో పాటు ఒక మ్యాచ్ ఆడ‌కుండా నిషేధం విధించింది.

ప‌దిహేడో సీజ‌న్‌లో రానా 8 మ్యాచుల్లో 11 వికెట్లు ప‌డ‌గొట్టాడు. సోమ‌వారం ఢీల్లీని 7 వికెట్ల‌తో చిత్తు చేసిన కోల్‌క‌తా రెండో స్థానం ప‌దిలం చేసుకుంది. త‌దుప‌రి మ్యాచ్‌లో శ్రేయ‌స్ అయ్య‌ర్ బృందం మే 3న ముంబై ఇండియ‌న్స్‌తో త‌ల‌ప‌డ‌నుంది.