Glenn Maxwell: మ్యాక్సీ ఊచకోత.. హిట్‌మ్యాన్‌ రికార్డు సమం..

Glenn Maxwell: వెస్టిండీస్‌తో అడిలైడ్‌ ఓవల్‌ వేదికగా జరుగుతున్న రెండో టీ20లో గ్లెన్‌ మ్యాక్స్‌వెల్‌ కరేబియన్లపై తనదైన ఆటతో విరుచుకుపడ్డాడు. 25 బంతుల్లోనే అర్థ సెంచరీ పూర్తిచేసిన మ్యాక్సీ.. 50 బంతుల్లో శతకం బాదాడు.

Glenn Maxwell: ఆస్ట్రేలియా విధ్వంసక వీరుడు, మిడిలార్డర్‌ బ్యాటర్‌ గ్లెన్‌ మ్యాక్స్‌వెల్‌ మరోసారి బీస్ట్‌ మోడ్‌లోకి వచ్చాడు. వెస్టిండీస్‌తో అడిలైడ్‌ ఓవల్‌ వేదికగా జరుగుతున్న రెండో టీ20లో ఈ సిక్సర్ల వీరుడు కరేబియన్లపై తనదైన ఆటతో విరుచుకుపడ్డాడు. 25 బంతుల్లోనే అర్థ సెంచరీ పూర్తిచేసిన మ్యాక్సీ.. 50 బంతుల్లో శతకం బాదాడు. మొత్తంగా ఈ మ్యాచ్‌లో 55 బంతులాడిన మ్యాక్స్‌వెల్‌.. 12 బౌండరీలు, 8 భారీ సిక్సర్ల సాయంతో 120 పరుగులు చేసి నాటౌట్‌గా నిలిచాడు.

టీ20లలో మ్యాక్సీకి ఇది ఐదో శతకం కావడం గమనార్హం. తద్వారా అతడు అంతర్జాతీయ టీ20 క్రికెట్‌లో అత్యధిక శతకాలు చేసిన బ్యాటర్లలో రోహిత్‌ శర్మతో సమానంగా నిలిచాడు. పొట్టి ఫార్మాట్‌లో రోహిత్‌ ఖాతాలోనూ ఐదు శతకాలున్నాయి. ఈ జాబితాలో సూర్యకుమార్ యాదవ్‌ (4) , కొలిన్‌ మన్రో (న్యూజిలాండ్‌ – 3), పాకిస్తాన్‌ స్టార్‌ బ్యాటర్‌ బాబర్‌ ఆజమ్‌ మూడు సెంచరీలతో తర్వాతి స్థానాల్లో ఉన్నారు.

 

Most Hundreds in T20I:

Glenn Maxwell – 5* (94 innings)

Rohit Sharma – 5 (143 innings) pic.twitter.com/38HMakhBJL

— Johns. (@CricCrazyJohns) February 11, 2024

రోహిత్‌ శర్మ 151 మ్యాచ్‌లలో ఐదు సెంచరీలు చేస్తే మ్యాక్స్‌వెల్‌ మాత్రం 102 మ్యాచ్‌లలోనే ఈ ఘనతను అందుకోవడం విశేషం. అదీగాక మ్యాక్స్‌వెల్‌ సెంచరీ చేసిన ప్రతి మ్యాచ్‌లోనూ నాటౌట్‌గా నిలిచాడు. ఇది కూడా ఓ రికార్డే. ఇక మ్యాచ్‌ విషయానికొస్తే అడిలైడ్‌లో మ్యాక్స్‌వెల్‌ వీరబాదుడుతో పాటు ఆఖర్లో టిమ్‌ డేవిడ్‌ (14 బంతుల్లో 31 నాటౌట్‌, 2 ఫోర్లు, 2 సిక్సర్లు) వీరవిహారంతో ఆసీస్‌.. నిర్ణీత 20 ఓవర్లలో 4 వికెట్ల నష్టానికి 241 పరుగుల భారీ స్కోరుచేసింది.

టీ20లలో మ్యాక్స్‌వెల్‌ సెంచరీల వివరాలు:

1. 2016లో శ్రీలంకపై 145 నాటౌట్‌
2. 2018లో ఇంగ్లండ్‌పై 103 నాటౌట్‌
3. 2019లో ఇండియాపై 113 నాటౌట్‌
4. 2023లో ఇండియాపై 104 నాటౌట్‌
5. 2024లో వెస్టిండీస్‌పై 120 నాటౌట్‌