థీమ్‌కు షాక్‌

అన్‌సీడెడ్‌ చేతిలో డొమినిక్‌కు పరాభవం

పారిస్‌: మట్టికోర్టు పోరు ఫ్రెంచ్‌ ఓపెన్‌ గ్రాండ్‌స్లామ్‌ టోర్నీ తొలిరోజే సంచలనం నమోదైంది. ఆస్ట్రియా స్టార్‌, ప్రపంచ నాలుగో ర్యాంకర్‌ డొమినిక్‌ థీమ్‌ తొలి రౌండ్‌లోనే అన్‌సీడెడ్‌ ప్లేయర్‌ చేతిలో ఓడిపోయాడు. తొలి రెండు సెట్లు గెలిచినా.. ఆ తర్వాత పేలవ ప్రదర్శన చేసి పరాభవానికి గురయ్యాడు. ఆదివారం ఇక్కడ జరిగిన పురుషుల సింగిల్స్‌ తొలి రౌండ్‌లో నాలుగో సీడ్‌ థీమ్‌ 6-4, 7-5, 3-6, 4-6, 4-6తో పాబ్లో అండుజర్‌ (స్పెయిన్‌) చేతిలో ఓడాడు. 4 గంటల 28 నిమిషాల పాటు ఐదు సెట్లుగా సాగిన మ్యాచ్‌లో ఏకంగా 61 తప్పిదాలు చేసిన డొమినిక్‌ ఏడుసార్లు సర్వీస్‌ బ్రేక్‌కు గురై మూల్యం చెల్లించుకున్నాడు. అలాగే 11వ సీడ్‌ బటిస్టా అగట్‌, కరెనో బుస్టా, కరెన్‌ కచవోన్‌, ఫాబియో ఫొగిని, దిమిత్రోవ్‌ తొలి రౌండ్‌ మ్యాచ్‌ల్లో విజయాలు సాధించారు. అగట్‌ (స్పెయిన్‌) 6-4, 6-4, 6-2 తేడాతో తన దేశానికే చెందిన మారియో విలేలాపై గెలిచాడు.