Cristiano Ronaldo: 12 ఏళ్ల త‌ర్వాత మాంచెస్ట‌ర్‌కు తిరిగొచ్చిన రొనాల్డో.. కుదిరిన కాంట్రాక్ట్‌

పోర్చుగ‌ల్ స్టార్ ఫుట్‌బాల‌ర్ క్రిస్టియానో రొనాల్డో( Cristiano Ronaldo ).. పదేళ్ల త‌ర్వాత మ‌ళ్లీ మాంచెస్ట‌ర్ యునైటెడ్ క్ల‌బ్‌కు తిరిగొచ్చాడు.

లండ‌న్‌: పోర్చుగ‌ల్ స్టార్ ఫుట్‌బాల‌ర్ క్రిస్టియానో రొనాల్డో( Cristiano Ronaldo ).. పదేళ్ల త‌ర్వాత మ‌ళ్లీ మాంచెస్ట‌ర్ యునైటెడ్ క్ల‌బ్‌కు తిరిగొచ్చాడు. ఇట‌లీకి చెందిన జువెంట‌స్ టీమ్ నుంచి అత‌ని బ‌దిలీ పూర్త‌యింది. రొనాల్డోతో రెండేళ్ల కాంట్రాక్ట్ కుదుర్చుకున్న మాంచెస్ట‌ర్ యునైటెడ్‌.. ఇందుకుగాను అత‌నికి 1.5 కోట్ల యూరోలు (సుమారు రూ.129 కోట్లు) చెల్లించ‌నుంది. అద‌నంగా 80 ల‌క్ష‌ల యూరోలు (సుమారు రూ.69 కోట్లు) కూడా యాడ్‌-ఆన్స్ రూపంలో అత‌నికి ద‌క్కే అవ‌కాశాలు ఉన్నాయి. ప్ర‌స్తుతానికి రెండేళ్ల‌పాటు ఉన్న ఈ కాంట్రాక్ట్‌ను మ‌రో ఏడాది పొడిగించే అవ‌కాశంతో రొనాల్డో దానిపై సంత‌కం చేశాడు.

మాంచెస్ట‌ర్ యునైటెడ్ టీమ్‌కు త‌న హృద‌యంలో ఎప్ప‌టికీ ప్ర‌త్యేక స్థానం ఉంటుంద‌ని ఈ సంద‌ర్భంగా రొనాల్డో అన్నాడు. గ‌తంలో ఈ టీమ్ త‌ర‌ఫున 292 మ్యాచ్‌లు ఆడి 118 గోల్స్ చేశాడు. ఆ త‌ర్వాత 2009లో రియ‌ల్ మాడ్రిడ్‌కు మారాడు. ఓల్డ్ ట్రాఫోర్డ్‌లో మ‌రోసారి ఆడ‌టానికి తాను ఆతృత‌గా ఎదురుచూస్తున్న‌ట్లు రొనాల్డో చెప్పాడు. రొనాల్డో గురించి వ‌ర్ణించ‌డానికి మాట‌లు చాల‌వ‌ని అటు యునైటెడ్ మేనేజ‌ర్ ఓల్ గ‌న్న‌ర్ అన్నాడు. ఆరు సీజ‌న్లపాటు యునైటెడ్‌కు ఆడిన రొనాల్డో.. మూడు ప్రిమియ‌ర్ లీగ్ టైటిల్స్ సాధించిపెట్టాడు.