క్రికెట్లో దక్షిణాఫ్రికా మాజీ ఆటగాడు డివీలియర్స్ని మిస్టర్ 360 అని పిలుస్తారంతా. స్టేడియం నలువైపులా షాట్లు ఆడడం, వేగంగా పరుగులు సాధించడంలో అతను దిట్ట. అలాంటి టెక్నిక్ అతనికి మాత్రమే సొంతం అనుకునేవాళ్లు. కానీ, ఇప్పుడు టీమిండియా బ్యాటర్ సూర్యకుమార్ యాదవ్ తన ఆటతీరుతో డివీలియర్స్ని తలపిస్తున్నాడు. సూపర్ 12 స్టేజీలో జింబాబ్వేపై సూర్య కుమార్ ఇన్నింగ్స్ (61 నాటౌట్) చూశాక అతడిని ఈతరం 360 ప్లేయర్ అంటున్నారు కొందరు మాజీ ఆటగాళ్లు. భారతజట్టు మాజీ ఆల్రౌండర్ ఇర్ఫాన్ పఠాన్, సూర్యని 360 డిగ్రీ ప్లేయర్ అని ఆకాశానికెత్తేశాడు. పఠాన్ కామెంట్కి బదులిస్తూ సూర్య 360 ప్లేయర్ తాను కాదని, డివీలియర్స్ అని చెప్పాడు .
‘ఈ ప్రపంచంలో 360 ఆటగాడు ఒక్కరే ఉన్నారు. అతడిలా ఆడేందుకు ప్రయత్నిస్తున్నా’ అన్నాడు సూర్య కుమార్ యాదవ్. తన గురించి సూర్య చేసిన కామెంట్ మీద డివీలియర్స్ స్పందించాడు. ‘నువ్వు చాలా తొందరగా మిస్టర్ 360 ప్లేయర్గా ఎదుగుతున్నావు. జింబాంబ్వేపై 360 ప్లేయర్ కంటే చాలా గొప్పగా ఆడావు’ అని సూర్యని ప్రశంసించాడు డివిలియర్స్. ఈ ఏడాది పొట్టి ప్రపంచకప్లో పరుగుల వరద పారిస్తున్నాడు. తనకు మాత్రమే సొంతమైన షాట్లతో అలరిస్తున్నాడు. దాంతో, మాజీ క్రికెటర్లు సూర్య బ్యాటింగ్ని మెచ్చుకోకుండా ఉండలేకపోతున్నారు. డివిలియర్స్ ఐపీఎల్ల్లో రాయల్ ఛాలెంజర్స్ బెంగళూరు తరఫున ఆడాడు.