BANvsNZ: బంగ్లాదేశ్ స్పిన్నర్ తైజుల్ ఇస్లాం టెస్టు క్రికెట్లో అరుదైన ఘనత సాధించాడు. సిల్హెట్ వేదికగా న్యూజిలాండ్తో జరిగిన తొలి టెస్టులో బంగ్లాదేశ్ చారిత్రాత్మక విజయం సాధించడంలో కీలక పాత్ర పోషించిన ఈ స్పిన్నర్ ఆధునిక క్రికెట్లో ఫ్యాబ్-4 గా పిలువబడుతున్న నలుగురు బ్యాటర్లను ఔట్ చేయడం గమనార్హం. తొలి టెస్టులో కివీస్ స్టార్ బ్యాటర్ కేన్ విలియమ్సన్ను అతడు రెండుసార్లూ ఔట్ చేశాడు. తద్వారా ఫ్యాబ్ – 4 జాబితాలో ఉన్న విరాట్ కోహ్లీ, స్టీవ్ స్మిత్, జో రూట్తో పాటు కేన్ మామను కూడా ఔట్ చేసిన బౌలర్గా నిలిచాడు.
తైజుల్ 2016లో మీర్ఫూర్ వేదికగా ఇంగ్లండ్తో జరిగిన టెస్టులో జో రూట్ను ఔట్ చేయగా ఆ మరుసటి ఏడాది చిట్టగాంగ్లో జరిగిన టెస్టులో ఆసీస్ బ్యాటర్ స్టీవ్ స్మిత్ను రెండుసార్లు ఔట్ చేశాడు. ఇక 2017, 2022లో విరాట్ కోహ్లీని కూడా ఔట్ చేసిన తైజుల్ తాజాగా కేన్ విలియమ్సన్ను పెవిలియన్కు పంపి అరుదైన ఘనత నెలకొల్పాడు.
A match-defining bowling performance from Taijul Islam 🤩#WTC25 | #BANvNZ pic.twitter.com/fEbsKUdH13
— ICC (@ICC) December 2, 2023
బంగ్లా – కివీస్ మధ్య నేడు ముగిసిన తొలి టెస్టులో మొదటి ఇన్నింగ్స్లో బంగ్లాదేశ్ 310 పరుగులు చేయగా కివీస్ 317 రన్స్ చేసింది. అనంతరం రెండో ఇన్నింగ్స్లో బంగ్లా.. 338 పరుగులు చేసి న్యూజిలాండ్ ఎదుట 331 పరుగుల టార్గెట్ను నిలిపింది. కానీ ఛేదనలో పర్యాటక జట్టు 181 పరుగులకే కుప్పకూలింది. తైజుల్ ఇస్లాం తొలి ఇన్నింగ్స్లో నాలుగు వికెట్లు తీయగా రెండో ఇన్నింగ్స్లో ఆరు వికెట్లతో చెలరేగాడు. మొత్తంగా ఈ టెస్టులో అతడు పది వికెట్లు పడగొట్టడం గమనార్హం. టెస్టులలో అతడికి ఈ ఫీట్ నమోదు చేయడం ఇది రెండోసారి.