Super Over | మహారాజా ట్రోఫీలో అరుదైన సన్నివేశం.. మూడో సూపర్‌ ఓవర్‌కు తేలిన ఫలితం

క్రికెట్‌లో మరీ ముఖ్యంగా పొట్టి ఫార్మాట్‌లో ఇరు జట్ల స్కోర్లు సమం అయినప్పుడు ఫలితాన్ని తేల్చే ‘సూపర్‌ ఓవర్‌' ఒక్కటి ఉంటేనే అభిమానులకు జబర్దస్త్‌ మజా ఉంటుందంటే అలాంటివి 3 ఉంటే ఇంకేమైనా ఉందా..! దానిని చూసినోళ్లంతా ‘సూపరో.. సూపరస్య.. సూపరోభ్య:’ అనాల్సిందే.

• సూపరో.. సూపరస్య.. సూపరోభ్య:

Super Over | బెంగళూరు: క్రికెట్‌లో మరీ ముఖ్యంగా పొట్టి ఫార్మాట్‌లో ఇరు జట్ల స్కోర్లు సమం అయినప్పుడు ఫలితాన్ని తేల్చే ‘సూపర్‌ ఓవర్‌’ ఒక్కటి ఉంటేనే అభిమానులకు జబర్దస్త్‌ మజా ఉంటుందంటే అలాంటివి 3 ఉంటే ఇంకేమైనా ఉందా..! దానిని చూసినోళ్లంతా ‘సూపరో.. సూపరస్య.. సూపరోభ్య:’ అనాల్సిందే. బెంగళూరు వేదికగా కర్నాటక స్టేట్‌ క్రికెట్‌ అసోసియేషన్‌ (కేఎస్‌సీఏ) నిర్వహిస్తున్న మహారాజ ట్రోఫీలో భాగంగా హుబ్లీ టైగర్స్‌, బెంగళూరు బ్లాస్టర్స్‌ మధ్య జరిగిన మ్యాచ్‌లో ఈ అద్భుతం ఆవిష్కృతమైంది.

మనీష్‌ పాండే సారథ్యంలోని హుబ్లీ 20 ఓవర్లలో 164 పరుగులకు ఆలౌట్‌ అవగా బెంగళూరు సైతం 20 ఓవర్లకు సరిగ్గా 164 వద్దే ఆగిపోయింది. దీంతో మ్యాచ్‌ సూపర్‌ ఓవర్‌కు దారితీసింది. తొలి సూపర్‌ ఓవర్‌లో మొదట బ్యాటింగ్‌ చేసిన బెంగళూరు 10/1 స్కోరు చేయగా 11 పరుగుల ఛేదనలో హుబ్లీ కూడా 10/0 చేసింది. రెండో సూపర్‌ ఓవర్‌లో హుబ్లీ 8 రన్స్‌ చేస్తే బెంగళూరు 6 బంతుల్లో 8 పరుగులకే చేతులెత్తేసింది. ఇక మూడో సూపర్‌ ఓవర్‌లో బెంగళూరు 12/1 స్కోరు చేయగా హుబ్లీ(13)తరఫున మన్వంత్‌ కుమార్‌ రెండు ఫోర్లు బాదడంతో నిర్వాహకులు ఊపిరి పీల్చుకున్నారు.