థ్యాంక్యూ.. రెబెకా!

• స్కాట్లాండ్‌ జెర్సీ రూపొందించిన 12 ఏండ్ల బాలిక

దుబాయ్‌: ప్రతిష్ఠాత్మక టీ20 ప్రపంచకప్‌లో పాల్గొనే తమ దేశ క్రికెట్‌ జట్టు జెర్సీని 12 ఏండ్ల బాలిక రూపొందించింది. ఈసారి ప్రత్యేకత ఉండాలనే ఉద్దేశంతో స్కాట్లాండ్‌ క్రికెట్‌ (ఎస్‌సీ) తమ దేశ విద్యార్థుల నుంచి డిజైన్లను ఆహ్వానించింది. మొత్తం 200 మంది విద్యార్థులు పంపిన నమూనాల్లో హాడింగ్టన్‌కు చెందిన రెబెకా డౌనీ రూపొందించిన జెర్సీ ఎంపికైంది. దేశ జాతీయ చిహ్నం ‘థిస్టిల్‌’ రంగులైన ముదురు నీలం, ఊదా రంగులో దుస్తులు ఉండడంతో రెబెకా రూపొందించిన దుస్తులు ఎంపికయ్యాయి. జెర్సీ రూపొందించిన రెబెకాకు స్కాట్లాండ్‌ క్రికెట్‌ కృతజ్ఞతలు తెలిపింది. బంగ్లాదేశ్‌తో జరిగిన మ్యాచ్‌ను టీవీలో చూసి మద్దతుగా నిలిచిన రెబెకాకు క్రికెట్‌ స్కాట్లాండ్‌ తమ అధికారిక ట్విట్టర్‌లో థ్యాంక్యూ అంటూ ట్వీట్‌ చేసింది.