Visit:
OnePlus 15 | మొబైల్స్ త‌యారీదారు వ‌న్ ప్ల‌స్ మరో స‌రికొత్త ఫ్లాగ్ షాప్ స్మార్ట్ ఫోన్‌ను భార‌త మార్కెట్‌లో లాంచ్ చేసింది. వ‌న్ ప్ల‌స్ 15 పేరిట ఈ ఫోన్‌ను విడుద‌ల చేశారు. గ‌త వారం కింద‌ట చైనా మార్కెట్‌లో ఈ ఫోన్‌ను లాంచ్ చేయ‌గా ప్ర‌స్తుతం భార‌త్‌లోనూ ఈ ఫోన్‌ను రిలీజ్ చేశారు. ఇందులో ప‌లు అద్భుత‌మైన ఫీచ‌ర్ల‌ను అందిస్తున్నారు. ఈ ఫోన్‌లో ఆండ్రాయిడ్ 16 ఆప‌రేటింగ్ సిస్ట‌మ్ ఆధారిత ఆక్సిజ‌న్ ఓఎస్ 16ను ఏర్పాటు చేశారు. ఇది అద్భుత‌మైన ఏఐ ఫీచ‌ర్ల‌ను క‌లిగి ఉంది. యూజ‌ర్లు ఈ ఫోన్‌ను చాలా స్మూత్‌గా ఉప‌యోగించుకునేలా తీర్చిదిద్దారు. అత్యంత అధునాత‌న ఇంటెలిజెంట్ లాంగ్వేజ్ టూల్స్‌ను ఇందులో అందిస్తున్నారు. గూగుల్‌కు చెందిన జెమిని ఏఐ అసిస్టెంట్‌ను కూడా ఇచ్చారు. ఈ ఫోన్ కు గాను 4 ఆప‌రేటింగ్ సిస్ట‌మ్ అప్ డేట్స్‌ను, 6 ఏళ్ల వ‌ర‌కు సెక్యూరిటీ అప్‌డేట్స్‌ను అందిస్తామ‌ని కంపెనీ చెబుతోంది.
వ‌న్ ప్ల‌స్ 15 స్మార్ట్ ఫోన్‌లో 6.78 ఇంచుల అమోలెడ్ డిస్‌ప్లేను ఏర్పాటు చేశారు. ఇది 1.5కె ప్ల‌స్ రిజ‌ల్యూష‌న్‌ను, 120 హెడ్జ్ రిఫ్రెష్ రేట్‌ను క‌లిగి ఉంది. క‌నుక డిస్‌ప్లే అద్భుత‌మైన క్వాలిటీని క‌లిగి ఉంటుంది. అత్యంత నాణ్య‌మైన దృశ్యాల‌ను డిస్‌ప్లేపై వీక్షించ‌వ‌చ్చు. సూర్య‌కాంతిలోనూ ఈ ఫోన్ డిస్‌ప్లే స్ప‌ష్టంగా క‌నిపించేలా దీనికి 1800 నిట్స్ వ‌ర‌కు పీక్ బ్రైట్ నెస్ ఫీచ‌ర్‌ను అందిస్తున్నారు. గేమింగ్ కోసం ప్ర‌త్యేకంగా 165 హెడ్జ్ రిఫ్రెష్ రేట్‌ను సెట్ చేసుకోవ‌చ్చు. దీంతో అద్భుత‌మైన గ్రాఫిక్స్‌ను ఆస్వాదించ‌వ‌చ్చు. 165ఎఫ్పీఎస్ వ‌ర‌కు ఈ డిస్‌ప్లే స‌పోర్ట్ చేస్తుంది. గేమ‌ర్స్ కోసం ప్ర‌త్యేకంగా ఈ ఫీచ‌ర్‌ను అందించారు. ఇక ఈ ఫోన్‌లో స్నాప్ డ్రాగ‌న్ 8 ఎలైట్ జెన్ 5 ఆక్టాకోర్ ప్రాసెస‌ర్‌ను ఇచ్చారు. 16జీబీ వ‌ర‌కు ర్యామ్ ల‌భిస్తుంది. 512జీబీ వ‌ర‌కు స్టోరేజ్ ఆప్ష‌న్‌ను ఇచ్చారు. ఈ ఫోన్‌కు ప్ర‌త్యేకంగా క్ర‌యో వెలాసిటీ కూలింగ్ సిస్ట‌మ్ ఉంది. క‌నుక ఫోన్‌ను ఎంత తీవ్రంగా ఉప‌యోగించిన‌ప్న‌టికీ అంత సుల‌భంగా హీట్‌కు గురి కాదు.
ఈ ఫోన్ కు వెనుక వైపు 50 మెగాపిక్స‌ల్ మెయిన్ కెమెరాను ఇచ్చారు. మరో 50 మెగాపిక్స‌ల్ కెపాసిటీ ఉన్న అల్ట్రావైడ్ కెమెరా కూడా ఉంది. అలాగే 50 మెగాపిక్స‌ల్ కెపాసిటీ ఉన్న ఇంకో టెలిఫొటో లెన్స్‌ను కూడా ఏర్పాటు చేశారు. దీని స‌హాయంతో అద్భుత‌మైన జూమ్ క్వాలిటీని పొంద‌వ‌చ్చు. అలాగే ముందు భాగంలో 32 మెగాపిక్స‌ల్ కెమెరాను ఇచ్చారు. ఇక ఈ ఫోన్‌లో 7300 ఎంఏహెచ్ భారీ కెపాసిటీ ఉన్న బ్యాట‌రీని ఏర్పాటు చేశారు. ఈ ఫోన్‌కు ఇది కూడా ఒక ప్ర‌ధాన ఆక‌ర్ష‌ణ‌గా చెప్ప‌వ‌చ్చు. దీనికి 120 వాట్ల వ‌ర‌కు ఫాస్ట్ చార్జింగ్‌కు స‌పోర్ట్ ను అందిస్తున్నారు. అందువ‌ల్ల ఫోన్‌ను వేగంగా చార్జింగ్ చేసుకోవ‌చ్చు. అలాగే 50 వాట్ల వ‌ర‌కు వైర్‌లెస్ చార్జింగ్‌కు స‌పోర్ట్‌ను సైతం ఇందులో అందిస్తున్నారు. ఇక ఈ ఫోన్‌కు గొరిల్లా గ్లాస్ ప్రొటెక్ష‌న్ ల‌భిస్తుంది. 12జీబీ, 16జీబీ ర్యామ్, 256జీబీ, 512జీబీ స్టోరేజ్ ఆప్ష‌న్ల‌లో ఈ ఫోన్‌ను లాంచ్ చేశారు.
వ‌న్ ప్ల‌స్ 15 స్మార్ట్ ఫోన్‌లో డ్యుయ‌ల్ సిమ్‌ల‌ను వేసుకోవ‌చ్చు. ఇన్ డిస్‌ప్లే అల్ట్రాసోనిక్ ఫింగ‌ర్ ప్రింట్ సెన్సార్ ల‌భిస్తుంది. ఇన్ ఫ్రా రెడ్ సెన్సార్ కూడా ఉంది. యూఎస్‌బీ టైప్ సి ఆడియోకు ఇందులో స‌పోర్ట్ ల‌భిస్తుంది. ఐపీ66, 68, 69 వాట‌ర్ అండ్ డ‌స్ట్ రెసిస్టెన్స్ ఫీచ‌ర్‌ను ఇందులో అందిస్తున్నారు. 5జి సేవ‌ల‌ను ఉప‌యోగించుకోవ‌చ్చు. డ్యుయ‌ల్ 4జి వీవోఎల్‌టీఈ ఫీచ‌ర్ కూడా ల‌భిస్తుంది. వైఫై 7, బ్లూటూత్ 6.0, ఎన్ఎఫ్‌సీ, యూఎస్‌బీ టైప్ సి వంటి అద‌న‌పు స‌దుపాయాల‌ను సైతం ఇందులో అందిస్తున్నారు. ఇక ఈ ఫోన్‌ను ఇన్ఫినిట్ బ్లాక్‌, శాండ్ స్టార్మ్‌, అల్ట్రా వ‌యొలెట్ క‌ల‌ర్ ఆప్ష‌న్ల‌లో లాంచ్ చేశారు.
ఈ ఫోన్‌కు చెందిన 12జీబీ ర్యామ్, 256జీబీ స్టోరేజ్ మోడ‌ల్ ధ‌ర రూ.72,999 ఉండ‌గా, 16జీబీ ర్యామ్, 512జీబీ స్టోరేజ్ మోడ‌ల్ ధ‌రను రూ.79,999గా నిర్ణ‌యించారు. ఈ ఫోన్‌ను వ‌న్ ప్ల‌స్ ఆన్‌లైన్ స్టోర్‌తోపాటు వ‌న్ ప్ల‌స్ స్టోర్ యాప్‌, అమెజాన్‌, అన్ని ఆఫ్‌లైన్ స్టోర్స్‌లో, వ‌న్ ప్ల‌స్ ఎక్స్‌పీరియెన్స్ స్టోర్స్‌లో ఈరోజు నుంచే విక్ర‌యిస్తున్నారు. ఈ ఫోన్‌పై ప‌లు ఆఫ‌ర్ల‌ను సైతం పొంద‌వ‌చ్చు. ఈ ఫోన్‌ను కొన్న‌వారికి వ‌న్ ప్ల‌స్ నోర్డ్ బ‌డ్స్ 3ని ఉచితంగా అందిస్తున్నారు. ఇది లిమిటెడ్ పీరియ‌డ్ ఆఫ‌ర్ అని కంపెనీ చెబుతోంది. హెచ్‌డీఎఫ్‌సీ బ్యాంకు కార్డుల‌తో ఈ ఫోన్‌ను కొనుగోలు చేస్తే రూ.4వేల వ‌ర‌కు బ్యాంక్ డిస్కౌంట్‌ను ఇస్తారు. ఎక్స్ ఛేంజ్ బోన‌స్ కింద మరో రూ.4వేల వ‌ర‌కు పొంద‌వ‌చ్చు. 180 రోజుల వ‌ర‌కు ఫోన్‌ను ఉచితంగా రీప్లేస్ చేసుకునే ప్లాన్‌ను సైతం అందిస్తున్నారు. 6 నెల‌ల వ‌ర‌కు నో కాస్ట్ ఈఎంఐ స‌దుపాయం కూడా ల‌భిస్తోంది.
