world’s Largest Power Bank | ఈరోజుల్లో అందరికీ ఉండే ఒకే ఒక కామన్ ప్రాబ్లమ్ సెల్ఫోన్ చార్జింగ్. ఇంట్లో ఉన్నప్పుడు సెల్ఫోన్ చార్జింగ్ వల్ల పెద్ద సమస్య ఉండదు కానీ.. ఎక్కడికైనా బయటికి వెళ్లినప్పుడు మాత్రం సెల్ఫోన్ చార్జింగ్తో పరేషాన్ అవుతుంది. పవర్ బ్యాంకులు తీసుకెళ్లినా ఫోన్కు కావాల్సిన చార్జింగ్ పెట్టుకోలేం. ఒక్కసారి పెట్టుకుంటే పవర్ బ్యాంక్ కూడా డెడ్ అయిపోతుంది. బయటికెళ్లినప్పుడు, ఒక వేళ ఇంట్లో కరెంట్ లేని సమయంలో సెల్ఫోన్, లాప్టాప్ లాంటి వాటికి చార్జింగ్ ఎలా పెట్టుకోవాలి. అటువంటి సమస్యలకు చెక్ పెట్టేందుకు చైనాకు చెందిన జెంగ్ ఒక సొల్యూషన్ చూపించాడు.
అదే 2 కోట్ల 70 లక్షల ఎంఏహెచ్ కెపాసిటీతో తయారు చేసిన ప్రపంచంలో అతి పెద్ద పవర్ బ్యాంక్. ఇంత పెద్ద పవర్ బ్యాంక్ను మీరు ఎక్కడా చూసి ఉండరు. సాధారణంగా ఒక స్మార్ట్ఫోన్లో 4000 ఎంఏహెచ్ కెపాసిటీతో బ్యాటరీ ఉంటుంది. కానీ.. ఇది మాత్రం 2 కోట్ల 70 లక్షల ఎంఏహెచ్ కెపాసిటీని కలిగి ఉండటంతో దీనికి ఒకేసారి 5000 ఫోన్లను చార్జ్ చేసుకోవచ్చు.
ఫోన్లు, లాప్టాప్లతో పాటు ఎలక్ట్రిక్ స్కూటర్లకు కూడా ఈ పవర్ బ్యాంక్తో చార్జింగ్ చేయొచ్చు. అలాగే టీవీ, వాషింగ్ మెషిన్ లాంటివి కూడా కనెక్ట్ చేసుకోవచ్చు. మొత్తానికి ఎలక్ట్రిసిటీ అవసరం లేకుండా ఈ పవర్ బ్యాంక్ను ఉపయోగించుకునేలా జెంగ్ దీన్ని తయారు చేశాడు.
దాన్ని ఎలా తయారు చేశాడో.. దానికి సంబంధించిన వీడియోను కూడా జెంగ్ తన యూట్యూబ్ అకౌంట్లో షేర్ చేశాడు. దీంతో ఆ వీడియో ప్రస్తుతం సోషల్ మీడియాలో తెగ వైరల్ అవుతోంది.